اوميد

يازار: احمد اونال جم

كؤچورن: عيوض (ائيواز) بيات

 

قيرخ ياشلارينداکي آدامين اللري قوينونا گئتدي، تر- تله‌سيك  قوينوندان چيخارديغي کاغيذي يينه همن ياشلارداکي آيري آدامين اللرينه قويدور. قارانليق كوچه‌ده يالنيزديلار آما قورخويلا يان- يؤره‌سينه باخدي، سونرا فيسيلدادي[1]؛

- قارداش گئدر دئييل مي؟

- مراک ائتمه[2] سن، اؤز اللريمله بويوک ائلچيلييه وئره‌جه‌ييم.

گولومسه‌مه‌يه چاليشدي، آغزيندا ديشلري‌نين نرده ايسه ياريسي يوخدو.

- هرحال خبرلري يوخدور. يوخسا بيزه يارديم ائدرديلر، دئييل مي؟

- يوخ دئديم يا..، منيم گئتمه‌ديييم اولکه قالمادي نرده ايسه. اورالارا دا گئتديم. کيمسه‌نين خبري يوخ.

- کاغيذي يئتکيلي‌لره[3] وئررسن قارداش، سنده سؤيلرسن نه‌لر چئکديييميزي.

تورکجه‌يي ياخشي دانيشان روس گنج تَلَسدي؛

- تامام. تامام. ياخالاناجاييق[4] تئز پاراني وئر.

آدام يئني خاطيرلاميش كيمي قوينوندان ايللرجه ييغيشديرديغي پاراني چيخاردي.

- آل. آجيق، ايش تاپا بيلميرم. آما بو ايش ايچين حلال اولسون آل.

گنج روس پارايي سايارکن، او آنلاتمايا داوام ائتدي،

- چينليلر بيزي آج قويور، ايشسيز قويور. بير اوشاقدان چوخو ياساق، ايشسيز اولانلارين اوشاقلاري اولماسي دا  جزالانديريلير. اوغلانلاريميز، اونلارين قيزلارييلا ائولنه بيلمير آما اونلار توپراقلاريميزا صاحيب اولماق ايچين، بيزيم قيزلارلا زورلا ائولنيرلر. بعضيلريميز، هئچ اولمازسا قيزلاري آج قالماسين دييه ائولنديرير.

گنج سيخيلميشدي،

- ياخالانمادان من گئديم.

آدام گؤزو ياشاراراق تَلَسه‌رك سؤزلريني تاماملادي؛ "عيبادتيميزه ده انگل اولورلار. قادينلاريميزين زورلا باشيني آچيرلار."

- تامام. هاميسيني سؤيلييه‌جم، ياللا تئزاول.

بير آن يئرينده دوردو، آدامين آلتميش ياشيني گؤسترن اوزونه باخدي،سانکي کوشکولانميش[5] كيمي سوروشدو؛

- نئچه ياشينداسان؟

- قيرخ...

جاوابي دويدوقدان سونرا هيزلا (سرعتله) اوزاقلاشدي. دالدا قالان آدام، اوغلو كيمي گؤرونن گنجين آرديندان آجيلارلا بزَنميش اوزويله گولومسه‌يه‌رک ال ساللادي. بير سوره، قارانليق كوچه‌لره باخدي. سونرا اوزونه گولومسه‌مه ياييلدي. ايچينده يئشه‌رن اوميدي حيسس ائتدي، ديزلرينه يئني بير جان گلدي. ياشاما يئنيدن باغلاندي. اويسا اولکه‌سينده، دوغو تورکيستان‌دا اؤلوم ياشي‌نين چوخ دوشوک (پست) اولدوغونو ياخشي بيليردي.

* * *

گنج روس، پارايي آليب، مکتوبو آتمايي دوشونموشدو آما اکسيک ديشلرييله اؤزونه باخان تورکون خييالي پئشيني بيراخماميشدي. سونوندا چين‌دن آيريلمادان، تورکييه ائلچيلييينه باش ويريب، مکتوبو وئرميشدي. يئتکيلي، مکتوبو آليب اونا گؤزله‌مه‌ييني سؤيلدي. تيجارت ايچين چوخ اؤلکه‌يه گئدن روس، بيلدييي بير نئچه ديلين ايچينده ان ياخشي تورکجه‌ني اؤيرنميشدي. گؤزلركن دارآغاجينداکي 1998 تاريخلي آما بير نئچه آي اؤنجه‌سي‌نين قزئته‌لرينه گؤزو تاخيلدي. بيريني الينه آلدي آديني اوخودو؛ "راديکال". دوغو تورکيستانلا ايلگيلي بير يازي اولدوغونو بيلديكده اوخومايا داوام ائتدي؛ "دوغو تورکيستان‌داکي کؤکدن دين‌چي آخيملار (جريانلار) چيني تهديد ائدير."

بير گؤرَولي[6]،الينده گئري گؤنده‌ريلن مکتوبلا دالگين[7] روسا ياخينلاشدي؛

- بؤيوک ائلچي‌نين ايشي وار. سيزله گؤروشه بيلمييه‌جک".

روس، قزئته‌لري گؤستَره‌رک، شاشکين بير ايفاده ايله سوروشدو؛

- بو قزئته‌لر هانسي اولکه‌نيندير؟

گؤرَولي گولومسه‌دي،

- تورکييه.

- هاميسي مي؟

- البت. هاميسي.

آدام الينده کي قزئته‌ني بوشلاييب گئدرکن، گؤزونده دوغو تورکيستانلي آدامين اوزو جانلاندي، سانکي اؤزو ايله دانيشير كيمي ايدي؛

- ساغ اول قارداش، ساغ اول... ساغ اول...

ايچي‌نين بورخولدوغونو حيسس ائتدي.

[1]- دوداق آلتي دانيشماق. ياواشجا دانيشماق.

[2]- نگران اولما.

[3]- yetkili= صلاحيت دار، اختيار دار.

[4]- توتولماق، گيره گئچمك.

[5]- kuşkulanma= ترديد

[6]- görevli= مامور، موظف، فرستاده.

[7]- dalgın = پريشان حواس.