کؤچورمه

مداد

پائولو كويلو

حاضیرلایان: عیوض بیات

ننه‌سيني، بير مکتوب يازارکن ايزله‌ين اوشاق سوروشدو:

- ياشاديق‌لاريميز اوچون بير حيکايه‌مي يازيرسان؟ يوخسا منيم حاقيمدامي؟

ننه‌سي يازماغي کسدي و نَوه‌سينه بئله دئدي:

- اصلينده، سنين حاقيندا يازيرام. لاکين سؤزلردن داها اهميت‌لي‌سي، استفاده ائتديگيم مداد دي. اوميد ائديرم بؤيودويونده سن ده بو مداد کيمي اولارسان.

اوشاق ماراق‌لا مدادا باخدي. خصوصي بير قلم کيمي گؤرونموردو.

- لاکين داها گؤردويوم آيري مدادلار ايله بيردي!

- بو، سنين نئجه باخديغين ايله علاقه‌لي دير. مدادين 5 اهميت‌لي خصوصيتي واردير، کي سن اونلارا مؤحکم‌جه ياپيشديغيندا عؤمورون دينجليک ايچينده کئچه‌جک.

بيرينجي خصوصيت:

معجزه شئي‌لر ائده بيلرسن آما آتديغين آدديم‌لاري استقامت‌لنديرن بير ال اولدوغونو اصلا اونوتما. بيزيم اوچون بو ال اوجا ياراديجي‌نين نظامي‌دير و هر وقت اؤز قانون‌لاري ايله بيزي او استقامت‌لنديرر.

ايکينجي خصوصيت:

زامان زامان هر نه يازيرامسا دايانمام و قلمين اوجونو آچمام لازيمدير. بو قلمه بير آز آجي چکديرسه ده، نتيجه ده داها ايتي اولماسيني ساغلار. بونا گؤره بعضي آغري‌لارا دؤزمه‌يي اؤيرنمه‌لي‌سن، بو آغري‌لار سني داها ياخشي بير اينسان ائدر.

اوچونجو خصوصيت:

مداد، يانليش (سهو) بير شئي يازديغيندا بونو بير سيلگي ايله سيلمه‌گينه هر وقت امکان تانييار. ائتديگيميز بير شئيي سونرادان دوزلتمه‌نين پيس بير شئي اولماديغيني آنلاماليسان، عکسينه بو بيزي عدالت يولوندا توتماغا يارايان ان اهميتلي شئي‌لردن بيري‌دير.

دؤردونجو خصوصيت:

مدادين ان اهميتلي قيسمي، قلمين ائديلديگي تاختاسي يا دا چؤله عکس اولونان شکلي دئييل، ايچه‌ريسينده اشتراک ائدن گول‌له‌سي‌دير. اونا گؤره هر وقت اؤز ايچينه باخمالي، ان چوخ اونو قوروماليسان.

بئشينجي خصوصيتي ايسه هر وقت بير ايز بوراخماسي‌دير. عئيني شکيلده سن ده حياتدا ائتديگين هر شئيين بير ايز بوراخاجاغيني بيلمه‌لي و هر حرکتي‌نين فرقينده اولماليسان.

کؤچورمه

اورک

ياسوناري کاواباتا

روسجادان چئويره‌ني: آيدين خان

حاضیرلایان: عیوض بیات

قادين، سئومه‌ديگينه گؤره اونو آتيب گئتميش اريندن مکتوب آلدي. مکتوب اونون گئديشيندن ايکي ايل سونرا، اوزاق ديياردان گلميشدي.

او يازمیشدي:

- اوشاغي توپ‌لا اويناماغا قويما. اونون ضربه‌لري گليب منه چاتير و اورَييمه دَيير.

او دا دوققوز ياشلي قيزيندان رئزين (پلاستيك) توپو آليب گيزلتدي.

اريندن يئنه مکتوب گلدي. چوخ اوزاق بير ديياردان گؤندرميشدي. او يازمیشدي:

- قوي قيز دري باشماق گئيينيب مکتبه گئتمه‌سين. آياق‌لاري‌نين تاپپيلتي‌سي گليب منه چاتير، منه ائله گلير کي اورَييمي تاپدالاييرلار...

او، دري آياق‌قابي‌لار عوضينه قيزينا ضعيف کئچه‌دن حاضيرلانميش يوموشاق صندل‌لر وئردي. قيز چوخ آغلادي و آخيردا مکتبه گئتمه‌گين داشيني آتدي.

ايکينجي مکتوبون آردينجا بيرآي کئچَندن سونرا اَري بيريني ده گؤندردي. خطّي کله- کؤتور ايدي، اينام‌سيز قوجالار کیمی يازيلميشدي.

او يازمیشدي:

- قيزي چيني کاسادا يئمه‌يه قويما. او، قابين جينگيلتي‌سي گليب منه چاتير و اورَييمي پارچالايير...

و او، اوچ ياشداکي اوشاق‌لار کيمي قيزيني تاختا جوبوق‌لارلا يئديزديرمه‌يه باشلاتدي. قيزي‌نين اوچ ياشي اولدوغو وقت‌لر يادينا دوشدو: اري ده شاد، اؤزوندن راضي حالدا هله اونلارلا بيرليکده ياشاييردي.

بير دفعه قيزي اونا بير سؤز دئمه‌دن دولابا ياخينلاشدي و اؤز کاساسيني گؤتوردو... آنا، تئز- تله‌سيک قيزيندان چيني کاساني دارتيب آلدي و باغا توللادي. کاسا، داش دؤشنميش جيغيرا دَييب چيليکلندي (پارچالاندي). اونا ائله گلدي کي، سانکي اري‌نين اورَيي پارچا- پارچا اولدو. بلکه دوغرودان دا ايندي اونون قلبي سيندي. ناهار ماساسينا (ميزينه) ال آتدي و او دا باغا طرف اوچدو. - باخ، بو اولدو سس! او، کاغيذدان دوزلديلميش،- آچيليب- اؤرتولن آرا کسمه‌يه طرف آتيلدي، دلي کيمي يومروق‌لاري‌ ايله اونو دؤيَجله‌مه‌يه باشلادي و بدني‌نين آغيرليغيندان اونو جيراراق دؤشه‌مه‌يه ييخيلدي.

آ- نا! - قيز هؤنکوره‌رک اونا طرف قاچدي.

آ- نا... آ- نا...

او، آياغا قالخدي و قيزين ياناغيني شيلله‌له‌دي.

- بو سسي ائشيديرسن، ائشيديرسن، ياراماز قيز؟!

و يئنه اري مکتوب گؤندردي. کاغيذ لاپ اوزاقدان- يئني بير ديياردان عنوانلانميشدي.

اري يازيردي:

- سيز بوندان سونرا هئچ بير سس چيخارتمامالي‌سيز. سيز قاپي و پنجره‌لري نه آچمالي، نه ده باغلامالي‌سيز، سيز ساعاتي قورمامالي‌سيز کي، اونون عقربه‌لري‌نين تاققيلتي‌سي ائشيديلمه‌سين. سيز نفس آلمامالي‌سيز...

- سيز ائتمه‌مه‌لي‌سيز... سيز ائتمه‌مه‌لي‌سيز، سيز ائتمه‌مه‌لي‌سيز...

باشقا سؤزله؛ آنا و قيز اؤلدو.

آما، نه قدر غريبه اولسا دا، باليشين اوستونده کئچينميش آروادين اوزو ايله ياناشي، اونون اؤلموش اري‌نين اويويان صفتي ده گؤرونوردو...

کؤچورمه

ياخشي و پيس

پائولو كوئيلو

حاضیرلایان: عیوض بیات

لئوناردو داوينجي؛ «سون آخشام يئمه‌يي» آديندا رسميني چكمه‌يي دوشوندوگونده بؤيوک بير چتینلیک‌له قارشيلاشدي...

ياخشي‌ني «عيسي»نين بدنينده، پيسي ده عيسي‌نين يولداشي اولان و سون آخشام يئمه‌يينده اونا اهانت ائتمه‌يه قرار وئرن «يهودا»نين بدنينده تصوير ائتمک زوروندايدي...

رسمي ياريم بوراخاراق بو ايکي آداما مُدل اولاراق قوللانابيله‌جك بعضي‌لريني آختاريشا باشلادي. بير گون بير قروپون وئرديگي کنسرت سيراسيندا، كُر اوخويانلاردان بيري‌نين عيسي تصويرينه چوخ اويدوغونو گؤردو. اونو پوز وئرمه‌سي ايچين آتليه‌سينه دعوت ائتدي، سايي‌سيز قارالاما و عكس چكدي.

آرادان 3 ايل گئچدي. «سون آخشام يئمه‌يي» آز قالميشدي سونا چاتا، آنجاق لئوناردو داوينجي هله يهودا ايچين قوللاناجاغي مُدلي تاپا بلمه‌ميشدي...

لئوناردونون چاليشديغي کليسانين کاردينالي، رسمي تئز بيتيرمه‌سي ايچين رسّامي سيخيشديرمايا باشلادي.

گونلرجه آختارديقدان سونرا لئوناردو؛ وقتيندن تئز یاشلانمیش گنج بير آدام تاپدي. کهنه و جیریق پالتارلار ايچينده‌کي بو آدام سرخوشلوقدان اؤزوندن كئچميش بير دورومدا سكي کنارينا ييغيلميشدي.

لئوناردو؛ يارديمجيلارينا آدامي چتينليك‌له ده اولسا کليسايا گتيرمه‌لريني سؤيله‌دي. چونکو آرتيق قارالاماق چَكه‌جك زاماني قالماميشدي. کليسايا چاتديقدا يارديمجي‌لار آدامي آياغا تيکديلر.

يازيق، باشينا گلن‌لري آنلاماميشدي. لئوناردو آدامين اوزونده گؤرولن اينانجسيزليغي، گناهي، بئنجيلليگي (خودخواهي) رسمه گئچيريردي. لئوناردو ايشيني بيتيرديگينده، او زامانا قدر سرخوشلوغون ائتکي‌سيندن (تاثیریندن) قورتولموش اولان ويل آدام؛ گؤزلريني آچدي و بو گؤزل دووار رسميني گؤردو. تعجّب و حزن دولو بير سسله بئله دئدي:

- «من بو رسمي داها اؤنجه گؤردوم...»

- «نه زامان؟» دئيه سوروشدو لئوناردو داوينجي، او دا شاشيرميشدي.

- «اوچ ايل اؤنجه» دئدي آدام.

- «اليمده اووجومدا اولاني ايتيرمه‌دن اؤنجه... او سيرالاردا بير كُر ماهنيسي اوخويوردوم. بير چوخ خياليم واريدي. بير رسّام مني عيسي‌نين اوزو ايچين مُدل ائتمک ایچین دعوت ائتميشدي.»

ياخشي و پيسين اوزو عيني‌دير... هر شئي اينسانين يولونا نه زامان چيخديقلارينا باغلي‌دير...

کؤچورمه

اونودا بيلمزسن! (روزگار افندییئوانین یاشامینا بیر باخیش)

سودابه سروي

حاضیرلایان: عيوض بيات

بو گون چاغداش شعريميزده ده سَلَف‌لري‌نين يولونو لاييقينجه داوام ائتديرن بير سيرا استعدادلي قادين شاعيرلريميز وار. اونلاردان بيري ده «روزگار افندييئوا»دير.

اونون هله چوخ- چوخ ايل‌لر قاباق قلمه آلديغي بير سيرا شعرلري واردي کي، بونلار ديل آخيجيليغينا، ليريزمينه، ان اساسي ايسه يئني دست خطّينه، قافيه اوسلوب‌لارينا گؤره سئچيليردي:

چيخيرام داغلارا آي گولوم، سنسيز،

داغ دا غريب‌سير دومانسيز، چنسيز.

دولان بو دونياني، گئت دولان منسيز،

پشيمان اولسان دا آختارما مني...

هله طلبه ايکن يازديغي بو شعر او زامان اوخوجولارين ديل‌لر ازبري اولموشدو. طالع بئله گتيردي کي، من اونونلا چوخ- چوخ ايل‌لر سونرا ادبياتيميزين مقدس اوجاغي ساييلان يازيچي‌لار بيرليگينده گؤروشدوم. گؤزلرينده بؤيوک بير نيسکيل، کدر گؤردوم روزگار خانيمين. اصلينده بو کدر، بو نيسکيل اصل شاعيرين، يازيچي‌نين قلبينده هميشه اولور و آغير بير يوک کيمي بونو عؤمرو بويو اوره‌يينده گزديرمک اونلارين آلين يازيسيدير. اؤيرنديم کي، روزگار خانيمين آجيسي داها بؤيوکموش؛ نئچه ايل قاباق (1994 جو ايلده) عزيز اوغلو «امين» 23 ياشيندا دونياسيني دئييشيبميش... بونو بيلديکده چوخ کؤورَلديم، بير آنا کيمي اونون حيس‌لريني آنلاديم. مقدس «انجيل» ده دئييلير کي، «شاعير يازا- يازا اؤزونو خيلاص ائدير.» بلکه ده همدَمي اولدوغو تنها گئجه‌لرده يازديغي شعرلري روزگار خانيمين روحونو خيلاص ائتدي، حياتا اولان عشقيني سؤندوره بيلمه‌دي. روزگار خانيم يازدي، يازدي... بوتون قلبيني، اوره‌ييني پوئزييايا آچدي، اونونلا ياشادي، اونونلا نفس آلدي.

ادامه نوشته

ال‌لري کؤپک قاتيلي

ال‌لري کؤپک قاتيلي

تميراغا دمير

استانبولجادان كؤچوروب ساده‌لشديرن: عيوض بيات

بو سئودانين باشلانقيج تاريخيني خاطيرلاماياجاق قدر اونوتقان[1] دئييلدي اصلينده. ساده‌جه اونوتماق ايچين بئيني‌ني ريسئت[2]‌له‌مه‌يه چاليشيردي. نئجه باشلاديغيني، نئجه دوام ائتديگيني و نئجه سونوجلانديغيني خاطيرلاماق ايسته‌ميردي...

بوس‌بوتون باشقا بيري اولموشدو. آرتيق يول‌لارا دا باخميردي. قلبينده‌کي بو درده کيمسه درمان اولمازدي. گئجه‌لري سؤيه‌رک[3] ياتيب، صاباح‌لاري، دوغان گونه‌شه يامان دئيه‌رک اويانيردي.

بو ياشانان‌لار دريندن تيترَتميشدي اورَييني...

فاحشه اوشاق‌لاريني اؤلدوره‌جکدي ياخين بير تاريخده. پوليسه اؤزونو تسليم ائده‌جك قدر دلي قانلي، اينسان‌لارا قييماياجاق قدر حساس‌دي. بو سويوت (مجرد) انفاذ (اعدام) نه‌دن گرچکلشه‌جکدي ياخشي؟ بو يالانجي باهار چيچک‌لري‌نين سوچوندان آرتيق باخديغي گؤزلر سوچلويدو. آدام اولماياجاغي بللي اولان بير حيواني ائوجيللشديرمه‌يه (اهلي كردن) چاليشماق كيمي بيهوده بير گيريشيمده بولونموشدو. آما هر دؤنه، هر ائوجيللشديرمک ايسته‌ديگينده بير يئريني قاپيردي. يارالانيردي...

آراليق کؤپک‌لري ايله بيرليکده گزمه‌يي بير شئي ساناراق دولاشيردي. نه زامان صاحیبي بويوندوروغونو سؤکسه، او همن کؤپک‌لرين ايچينه قاريشاردي. اصيل بير شکيلده پيشيك پارچالاماق وارکن، گئديب ميخانا و بار اؤن‌لرينده اؤزونه آتيلاجاق سوموگو گؤزلردي، آيري آراليق کؤپک‌لري كيمي...

و پاويونون[4] گؤزتچي ايتي باجاريردي هاميسيني...

پاويونون صاحیبي اولاجاق حدده بوندان کئيف آلاراق، اؤز حيواني جينسيليگيني تأمين ائدردي، ائوده باشقالاري طرفيندن بئجَريلن آرواديندان خبرسيزجه...

آراليق کؤپَگي‌نين ائوجيللشمه‌يه‌جه‌گيني اؤيرَنه‌نه قدر چوخ يارا آلدي. عصيان ائتدي. کؤپَگي جزا وئردي. آجي‌لار آتدي يئمه‌گينه... آما کؤپک کؤپک‌ليگيندن واز گئچمه‌دي. صاحیبي‌نين شرفليجه وئرديگي چؤرَگي دئييل ده گؤزتچي کؤپه‌گي طرفيندن بئجَريلديکدن سونرا يالاديغي سوموگو ترجيه ائتدي.

کؤپک...  رذيل کؤپک...

نه ايسه کي صاحیبي اولاجاق فرق ائتدي بو ائوجيللشمه‌مه حالينا، آما بو آرادا بوتون محلله‌ني ده رذيل ائتدي. اؤزو ده رسوا اولدو...

ايندي صاحیبي تک وارليغي اولان کؤپَگيني بوراخدي. نه حالين وارسا گؤر درجه‌سينه... اودا شرفسيزجه ياشايان فاحيشه دؤل[5]‌لري‌نين يانينا گئتدي. کؤپک کؤپکليگيني ائتدي... صادق اولمادي. بير پيشيك روحو داشييارميش كيمي نانکور و عاجيز داوراندي...

گئتمه‌دن اؤنجه، دفعه‌لرجه قاپدي صاحیبيني...

ادامه نوشته

ايكي مريض

خسته‌خانادا ايكي مريضي بير اوتاقدا ياتيرتميشديلار. مريض‌لرين بيريسی، اجازه واريدي گون اورتادان سونرا، هر گون بير ساعات تختي‌نين اوستونده اوتورا. آما او بيريسي مجبور ايدي يئريندن ترپنمه‌سين و داليسي او بيري مريضه طرف اولاراق ياتسین. اونلار ساعات‌لارجا بير بيري ايله خانیم‌لاريندان، عائله‌لريندن، ائولريندن و ... دانيشيرديلار.

گون اورتادان سونرا، تختي پنجره‌نين يانيندا اولان مريض، هر گون اوتوروردو و پنجره‌نين ائشيگينده گؤردوگو شئي‌لري يولداشينا تعريفله‌ييردي. يولداشي، بو بير ساعاتدا، ائشيگين وضعيتيني ائشيده‌رك، روحيه تاپيردي. بو پنجره بير پاركا آچيليردي كي گؤزل گؤلو واريدي و اؤردك‌لر ايله قو قوش‌لاري اوردا چيميرديلر. اوشاق‌لار دا قاييق‌لارلا سودا گزيرديلر. قوجامان آغاج‌لار ائشيگين گؤرونتوسونه گؤزل تصوير باغيشلاييردي و شهردن گؤزل بير گؤرونتو اوزاقدا گؤرسه‌نيردي. بونلاري پنجره‌نين قيراغيندا اولان مريض، يولداشينا تعريفله‌يه‌رك، يولداشي گؤزلريني يوموردو و بو گؤرونتولري ذهنين‌ده تصويره چكيردي.

گون‌لر و هفته‌لر كئچدي. بير گون سحر، سو گتيريب، مريض‌لري يويوندوران باخيجي، پنجره‌نين قيراغيندا اولان كيشيني گؤردو كي راحات‌ليق‌لا دونياسيني دَييشيب. باخيجي غصّه‌لنه‌رك، مستخدم‌لره دئدي كيشي‌ني اوتاغدان چيخارتديلار. او بيري كيشي باخيجي‌دان ايسته‌دي كي تختيني پنجره‌نين يانينا چكسينلر.

باخيجي بو ايشي گؤردو و ايش‌لري قورتاراندان سونرا اوتاغدان ائشيگه گئتدي. تك قالميش كيشي، ائشيگه باخماق ايچين، چتينليك‌له اؤزونو پنجره‌يه طرف چكدي. سونوندا ائلیيه بيلدي باخيشي‌ني پنجره‌نين ائشيگينه چئويرسين. آما گؤزو بير دووارا تيكيلدي. شاشيرميش حالدا باخيجي‌نی سسله‌دي و اؤلموش يولداشي‌نين تعريفله‌ديگي يالان منظره‌لرين نه‌دنيني سوروشدو.

باخيجي: «شاید ايستيرمش سنه اورك وئره. آخی او كيشي كور ايدي و حتي دوواري دا گؤرموردو» دئدي.

بو یازینی فارسجادان چئویرمیشم.

كؤچورمه- اؤيكوجوك

عؤمر سئيف الدين

عؤمر سئيف الدين (1884-1920) تورک ادبياتي‌نين ان چوخ اوخونان حيکايه يازاري دير. ان ياخين دوستو «علي جانيب» اونون حياتي و ياراديجيليغيندان بحث ائدن "عؤمر سئيف الدين و حياتي" آدلي کيتاب يازيب.

روشوت

بازار مئيداني‌نين بؤيوک چينار آغاجلاري، يئره دوشن کؤلگه‌لريني آلاجالانديراراق پيچيلداييرديلار. گوجلو کولَک اسيردي. وکيل «حاجي ناميق افندي» کاغيذلاري اوچماسين دئيه، زومرود کؤشکه بنزه‌ين کيچيک دوکاني‌نين پنجره‌لريني باغلادي. سونرا گئتدي، آچيق قاپيني ايتله‌يرکن هئيبه‌سي چيينينده، يوينلي آتي‌نين جيلووو الينده، ساريقلي، قيسا بويلو، يومرو بير کندلي‌نين ياخينلاشديغيني گؤردو.

- سلام علي معليم، -دئدي،- بئله واختسيز نه آختاريرسان بورادا؟ هله بازارا ايکي گون وار...

کندلي ايکي قارا نقطه‌يه بنزه‌ين باپ‌بالاجا گؤزلريني داها چوخ قيياراق:

- عليکم‌سلام ناميق افندي! بلايا دوشموشم. بير داوا اوچون گلميشم، -دئيه باشيني بولادي.

- ائئ، گل، بير آز صؤحبت ائدک.

- ائدک.

- درديني دانيش باخاق گؤرک.

- سندن باشقا کيمه دانيشاجام؟

آتينين جيلووونو تاختا سکاميانين ديرَگينه باغلادي. کيچيک دوکانا گيردي. جَويز (گيرده‌كان) ماساسينين ساغينداکي آلچاق حصير کتيلده اوتوردو. هئيبه‌سيني يانينا قويدو. ناميق افندي‌نين اوزاتديغي توتوندن بوکه-بوکه داواسيني دانيشماغا باشلادي. دوشمني کندين موختاري هويسوز اوغلو ايدي. هويسوز اوغلونون تورپاغيندا علي معليم واختي ايله بير بينا تيکديرميشدي. ايندي چوخ واخت کئچديکدن سونرا موختار بو بيناني ايسته‌ييردي. حال بوکي بينا کيمينديسه، يئر ده اونوندو دئمک...

- ناميق افندي چال ساققاليني قاشيدي. گؤزلوگونون اوستوندن باخاراق:

- سن حاقسيزسان، علي معليم، -دئدي.

- حاقسيزام؟

- بلي.

- خئير، من حاقلييام. نييه بيناني تيکرکن سسيني چيخارماميشدي.

- چيخارماسين.

- من حاقلي اولدوغومو بيليرم، ناميق افندي. داوادان ايمتيناع ائتمه‌يه‌جم.

- اودوزاجاقسان!

ادامه نوشته

كؤچورمه، اؤيكوجوك

افسانه

گولشن جَبي

اؤلوموندن سونرا «آوئل کايين»ي گؤردو. صحرادا گئديرديلر، هوندور بويلاري اونلاري اوزاقدان گؤستريردي. يئرده اوتوردولار، اوجاق قالاديلار و يئمکلريني قيزديرديلار. آغير گوندن سونرا يورولان هر کس کيمي سوسوردولار.

گؤي اوزونده هله کيمسه‌نين آد وئرمه‌ديگي اولدوز آليشدي. کايين قارداشينا دئدي:

- باغيشلا.

- آرتيق خاطيرلاميرام. بيز يئنه بيرليکده‌ييک. قارداش، کيم کيمي اؤلدوروب؟

- باخ، ايندي سن مني باغيشلادين، «آوئل». اونوتماق- باغيشلاماق دئمک‌دير. من ده خاطيرلاماماغا چاليشاجام.

- ائله‌دير، قارداش. نه قدر کي، خاطيرلاييرسان- گوناه‌کارسان.

کؤچورمه 33

آد گونو

فابييان دوبلئس (لاتين آمريکا، کاستاريکا، 1918-1997)

چئويره ني: موقدس شاهبازوو

حاضيرلايان: عيوض بيات

حسابدار يوخودان اوياندي و او آندا يادينا دوشدو کي، بو گون اونون آد گونودور.

او، عادتينه خيلاف چيخاراق عاييله باشچيسي کيمي هئچ کيمه "صاباحين خئيير" دئمه‌سه ده بونون فرقينه واران اولمادي.

سحر يئمه‌يي زاماني چؤره‌گين يانيندا اوتوران ميلچه‌يي اؤلدورمک ايچين اليني چارپايه‌يه مؤحکم‌جه چيرپدي. بو حرکتي ده نه آشباز قادينين، نه آروادي‌نين، نه ده کي، هله ده عاييله قورماييب والدين حيمايه‌سينده ياشايان بؤيوک ائولادلاري‌نين ديقتيني چکدي.

اوزونو قيرخاندا آزجا کسدي و يئددي مرتبه‌لي بير سؤيوش سؤيدو. البته کي، سؤيوش سؤيمه‌يي تعجب دوغوراجاقدي، لاکين هئچ کيم اونو ائشيتمه‌دي.

ائودن ايداره‌يه ايشه گئدنده «دونيا اوفراسييا»ني (donya Eufrasiya) اؤپمه‌دي، لاکين بو ائله ده بؤيوک اهميت داشيميردي، چونکو هردن آرواديني اؤپمه‌يي ياددان چيخاريردي. دليجه‌سينه قاپيني چيرپماسي آرواديني هيجانلانديردي.

اوتوبوسدا ايسه «دون آنتونيو» آياغيني باسدالايان سرنيشيني مؤحکم آجيلادي و اونو انتظاما چاغيران سوروجويه کؤهنه تانيشلاري‌نين تعجوبونه رغمن، غضبله يومروق گؤستره‌رک "آشاغي دوش" دئدي. کؤهنه تانيشلار دوشوندولر کي، دون آنتونيو تحقير اولونوب کي، سؤيوش سؤيور؟! بئله بير شئيي حياتدا آز حاللاردا گؤررسن.

اونلار حيسس ائتمه‌ديلر کي، اوتوبوسدان دوشنده دون آنتونيو اؤنده گئدن سرنيشينه تَپيک آتماغا جهد ائتدي، آما تَپيگي بوشا چيخدي.

او، ايش يئريني ايتيرمک قورخوسونو گيزلتمه‌يه چاليشاراق ايداره‌ده ده اؤزونو همين قايدادا آپاردي. آياق يولوندا اولاندا بيله‌رک‌دن سو باکيني خاراب ائتدي و اوره‌يينده رَئيس‌ين آناسيني دويونجا سؤيدو. ناهارا ائوه گلنده چوخ آز يئدي، هئچ کيمي دانيشديرمادي. ائودن چيخاندا قاپيني اؤرتمه‌دي، آما آجيقلا قاشيني چاتيب ايته توپوردو. او، اوتوز بئش ايل ايدي کي، توپورموردو.

هله ده مشاهده قابيليه‌تيني ايتيرمه‌ين دونيا اوفراسييانين عاغلينا گلدي کي، تمکينلي، ساکيت طبيعتلي ارينه نه‌ايسه اولوب و بوتون گونو اونسوز دا اؤزونده اولمايان اريندن، اونو داها دا عصبلشديرمه‌دن نه باش وئرديگيني اؤيرنمه‌يين يوللاريني آراماغا باشلادي.

ناهاردان سونرا ايداره‌يه قاييدان دون آنتونيو حدديني داها دا آشدي. موحاسيب هئچ بير سبب اولمادان نه ايسه سوروشماق مقصديله اونا ياخينلاشان کؤهنه ايش يولداشينا سيلله چکدي، واجيب سندلري جيريب کاتيبه‌نين اوزونه چيرپدي. اونون بو حرکتلري او قدر غريبه  گؤرونوردو کي، تعجوبلنميش رئيسي اونو ايشدن چيخارتماقدان چوخ، پسيخاتر (روان پزشك) چاغيرماق باره ده دوشونوردو.

ادامه نوشته

کؤچورمه 32

او. هئنري

ياشامي و بير حيكايه‌سي

كؤچورن: عيوض بيات

دونيا شؤهرتلي آمريکا يازيچي‌سي «او. هئنري» 1862- جي ايلده «قوزئي کارولينا»دا دوغولموشدور. اؤز يازديغي اثرلريني او. هئنري تخلوصو ايله چاپ ائتديرميشدير. اصلي آدي «ويليام سيدني پورتئر» اولان يازيچي دونيادا قيسا حيکايه يازان يازيچيلارين ان مشهور آدلاريندان بيري کيمي تانينير.

چوخ آز تحصيل آلان او. هئنري «آپتئک»ده ايشله‌ميش، بانک ايشلرينه گيرمك‌له مختلف ايشلرده چاليشديقدان سونرا، ايشله‌دييي بانک‌دان پول منيمسه‌مک‌ده گوناه‌لانديريلاراق اوچ ايلدن آرتيق حبسده ياتميشدير. ايلک حيکايه‌لريني ده مختلف ايمضالار آلتيندا ائله او حبسخانادا قلمه آلميشدير.

حبسدن چيخديقدان سونرا او. هئنري "The Rolling Stone" «آوارا» آدلي هفته‌ليک ساتيريک (هجوي) ژورنالي‌نين باش رئداکتورو وظيفه‌سينده ايشله‌ميشدير.

يازيچي حياتي‌نين سون سککيز ايلينده ايکي يوزدن چوخ حيکايه يازميشدير.

او. هئنري‌نين شوخلوق‌جول و جانلي اوسلوبدا قلمه آلديغي اثرلري بؤيوک اينسان کوتله‌لري‌نين بَينمه‌سينه سبب اولموش و بو ايشده او، چوخلو موتلولوق قازانميشدير.

اوستاليقلا قوردوغو و اينساني هيجانلانديران سوژه‌ني، اينجه يومورو و آدامين اوزونه سانکي شيلله وورورموش کيمي سونا چاتان گؤزله‌نيلمز سونلوقلاري‌ايله بيتن حيکايه‌لري، قيسا نووئللا ساحه‌سينده او. هئنري‌يه خاص بير "طرز" مئيدانا گتيرميش و بو بير چوخ يازيچي‌يا ايلهام منبعي اولموشدور.

ماراقلي سوژه خطي و اينجه يومورو ايله سئچيلن اثرلرينده آمريکا حيات طرزي‌نين بورژوا جمعيتي‌نين سوسيال ضديت و معنوي عئيبه‌جرليک‌لري عکسيني تاپميشدير.

يازيچي‌نين "کرال و کلم" رومانيندان علاوه حيکايه‌لريني توپلاديغي اساس کيتابلاري بونلاردير: "غربين اوره‌يي"، "دؤرد ميليون"، "يانان چيراق"، "شهرين سسي"، سئچمه‌لر، فيريلانانلار، آلتيليق‌لار و يئدديليک‌لر. اثرلري دفعه‌لرله ائکرانلاشديريلميشدير.

او. هئنري 1910- جو ايلده نيو يورک‌دا وفات ائتميشدير.

ادامه نوشته

کؤچورمه 31

محمد اسماعيل دن بیر شعر

گله‌جک...

يوللاردا يورولان آرخادا قالار،

آما عيناديندان دؤنمز يوخوشلار.

يومورتا قابيغي يووادا قالار

چيخيب گله‌جه‌يه اوچاندا قوشلار...

بيزه گون دوغورسا صاباحا ياخين،

عشقين آناسي‌مي دئيَک گئجه‌يه.

ادامه نوشته

کؤچورمه 29

عؤمرومون 10 ايلي

شبنم حسنعليزاده

حسرتله باهارين گليشيني گؤزله‌ييرم. او باهاري کي، دمير بارماقليقلار آراسيندان آنجاق طراوتيني، نفسيني دويا بيله‌رم. او باهاري کي، بوردا قادين دولو و هر طرفدن بير سس گلن، هر اورک‌دن بير درد بؤلوشولن، آما يئنه ده بو سس دولو ظلمت سس‌سيزليک‌ده، ائله همين بو دمير بارماقليقلار آراسيندان قوشلارين شَن جيکگيلتي‌سيني ائشيده‌جه‌يم. او باهاري کي، هله 9 ايل بئله‌جه گؤزله‌يه‌جم.

بو گون دوز 1 ايل کئچير اللريمه قانداللار تاخيلان او گوندن، آما هله ده گؤزلريمين اؤنوندن گئتمير حؤکمون اوخونان او آن. 4 طرفيمده محکمه ديوارلاري، قارشيمدا منه مني جللادميشام، غدارميشام کيمي گؤسترن، سويوق باخيشلي حاکيم، بير طرفيمده لئهيمه، اوبيريم‌ده ايسه عليه‌ايمه اولان وکيللر، آرخامدا ايسه نئچه- نئچه مني قينايان، منه نيفرتله باخان، منه توپورن گؤزلر... من نئجه ده يالقيزيميشام، آي آللاه! هئچ کيم مني دينله‌مه‌دي، آنلامادي، هئچ کيم منه اينانمادي.

اوف‌ف‌ف... اوف پول، پول، پول... ديليم اوتانا- اوتانا بوينوما آلير کي، نه قدر بؤيوک گوجه صاحیب‌دير بو بالاجا کاغيذ پارچاسي. ضعيف، يونگول اينسانلارين، اوستونده نئجه ده آغاليق ائدير پول، اؤز قوللاريني آغا گؤستره‌رک.

اَه‌ه...، باشلاديلار دانيشماغا يالانچي شاهيدلر، يئکه‌قارين وکيل‌لر. آما من هئچ کيمي ائشيتميرديم. دهشت‌دن بَرَلميش، آجيدان ياشارميش گؤزلريم‌له باخيرديم اطرافيما و دوشونوردوم: آمان آللاه گؤزلريمين اؤنوندن نئجه ده آخير حياتيم. بو گوجلو گؤرونن، اؤزلريني عاغيللي، دوغرو سايان اينسانلارين آراسيندا دئمه بيرجه منم‌ميش ضعيف گؤرونسم‌ده اصل گوجلو، دوغرو اولان. چونکو عمليم‌دن پئشمان دئييلم، آلنيم آچيق، اوزو آغ باخيرام قارشيمداکينا، بوينوم بوکوک دئييل.

گؤرن، ندير ناموس؟ وحشي بير پنجه‌نين و يا ديشين قاباغينا آتيلاجاق يئم‌مي، بير توز قدر دَيَري اولمايان گَرَک‌سيز بير شئي‌مي؟ جينايتکارام‌مي؟- بلي. بو آدي اؤزومه قازانديغيم او آن، جوشموشدو، دايانمادان حرکتده ايدي، فيرلانيردي فلگيمين چرخي. نه قدر هايقيرسامدا، هايقيريشيم سانکي ايچيمده بوغولموش، يا دا لال بير اينسانين چيغيرتيسي‌ايميش کيمي هئچ ائشيديلمه‌دي. هانسي کي، آوازيم ان سون تونونا قدر، چيغيريردي، آما بوشا، چونکو، هئچ نه دوردوران دئييل بو چرخي. بونا يئتن گوج يوخدور. بو گون زورلا منه صاحیب اولماق ايسته‌ين، ناموسومو کورلاماغا چاليشان و صاباح بونو باشقا، صاف، پاک قيزلارا قارشي تؤره‌دن اجلافا تشککورمو ائتمه‌لي‌ايديم؟ البته کي، يوخ! ناموسومو قورومالي‌ايديم و قورودوم. آما بونو بيلن وارمي؟ کيم بيله‌جک، کيم منه حاق وئره‌جک، کيم مني قوروياجاق؟ معده‌لريني گؤرمه‌ميش کيمي کاغيذ پارچالاري ايله دولدوروب، "اؤزلري‌نين ده قيزلاري وار"- آما بونو دوشونمه‌ين، منه پوزغون، لياقت‌سيز قادين دامغاسي ووران، داش اورکلي ظاليم‌لرمي؟ اورداکي يالانچي شاهيدلردن دئييل، منيم شاهيديم. بير تک آللاه بيلير اولان هر شئيي.

ديليميز دؤنوب- دولاشيب، هله زمانه کورلانيب دئييريک، داها دئميريک کي، اينسانلار کورلانيب و اؤز موردار اورکلري ايله کورلاييرلار اطرافي. نئجه ده وفاسيزدير بسله‌ديکلرين آي دونيا، نئجه ده پوزوبلار سني! نئجه ده کورلاييبلار بو اينسانلار بو فقير زمانه‌ني. حاکيمين منه حؤکم اوخودوغو همن او آن، اوره‌ييم دليجه چيرپينيردي. گؤزلريم هئچ نه گؤرمور، قولاقلاريم هئچ نه ائشيتميردي. بيرجه اونو بيليرديم کي، ناموسوم‌لا، آريم‌لا، اَييلمز قامتيم‌له، گوجلو قادينليغيم‌لا من فخر ائديرم. بلي، دوز 10 ايل، 10 بؤيوک ايل آلديلار عؤمرومدن. و من او آن آنلاديم کي، بو حياتدا نه قدر آغادير، نه قدر دوغرودور يالان.

کؤچورمه 28

ياخشي آنالارين اوغوللاري

ناطيق ممدلي

كؤچوروب ساده‌لشديرن: عيوض بيات

«مارسين اوچو»، اونون سئويملي گونودو. هميشه مارسين اوچو اولاندا ائله بيل گونش ده سخاوتلي اولوردو، هاواني ائله ايسيديردي کي، آدام ايليق ياز سحرينده بير يئرده قرار توتمور، گزمک، دولانماق، شوخلوقلاشماق، نه ايسه اورَيه‌ياتان بير ايش گؤرمک ايسته‌ييردي. ائله بيل توزلو- تورپاقلي کوچه‌نين ده توزو چکيلردي، دئيين‌گن قونشو کيشي ده ديليندن گولدن آغير بير سؤز چيخارمازدي مارسين اوچونده. طبيعت ده اينسان دا، بير سؤزله يئر اوزونده کي  بوتون جانلي- جانسيز نه وارسا، هر شئي گؤزللشيردي، تزه‌لَنيردي، يئني بير طراوتله ذوق اوخشاييردي مارسين اوچونده.

اوزون ايللر قارشيلاييب يولا سالديغي، سئويب عزيزله‌دييي اوچ مارسلارين بيرينده گؤزل- گؤيچک بالاسي دونيايا گلميشدي. آديني «ايلياس» قويموشدو. هئچ اري ايله ده مصلحتلشمه‌ميشدي. ائله‌جه آنادان اولان کيمي اوشاغي بئله آدلانديرميشدي. يولداشي دا خاطيرينه دَيمه‌ييب- «قوي سن دئين اولسون» دئميشدي. قاين آتاسي بير آز اينجيک دوشسه ده، سونرادان اونون دا ساققيزيني اوغورلاميشدي: «هه ايلياس اولاندا نه اولار، آللاه ساخلاسين، آديميزا لاييق اوغول اولسون، آتاسينا داياق دورسون». بئله‌جه مارسين اوچو اونون حياتي‌نين شيرين، خياللاري‌نين اوچان گونو ايدي. اوغلونون دونيايا گليشي ايله دونيا گؤزللشميشدي، اوشاقليق ايللري‌نين بوز- بوللانليق خاطيراتي، يئددي ياشيندان دادديغي يئتيمليگي، شهرين هيسينه- پاسينا، بورکوسونه اؤيرَشَنه کيمي چکدييي مصيبتلر ائله بيل يوخو اولموشدو. ايلياسين دوغولماسي ايله اونو اهاته ائدن هر شئي سانکي تزه‌دن دوغولموشدو. اؤزو ده داها گؤزل، داها قشنگ، هاميسي دا ايلياسا اوخشاييردي.

ادامه نوشته

كؤچورمه 27

سن ياتميشدين

آلبئرتو موراويا (ايتاليا، 1907-1990)

ايتاليانجادان چئويرن: جمشيد جمشيدوو

كؤچورن: ائيواز

دمير گيريش قاپيسي ياري آچيق ايدي. آنا ايچَري کئچمزدن اول، اوزرينده ايت‌لرين ساتيشا يالنيز سحر ساعات اونلا اون ايکي آراسيندا بوراخيلديغي باره‌ده يازي اولان لوحه‌ني آتايا گؤستريب دئدي:

- عاغيلسيزليغا بير باخ. بس اگر بيريسي سحرلر يوخودان منيم کيمي گئج اويانيرسا، اوندا نئجه؟

«جيرولامو» آتاسي‌نين وئره‌جه‌يي جاوابي گؤزله‌مه‌دن اونون اليندن سيويشيب حَيَطه بيرينجي گيردي. بودور، بوزومتول بئتون دؤشه‌مه؛ گيريش قاپيسي ايله اوزبه‌اوز آلچاق، ساريمتيل رنگلي ايداره بيناسي، سولدا- صاحیبلري اولان، آزميش ايتلرين موحافيظه اولوندوغو خوصوصي داملار، ساغدا ايسه صاحیبسيز ايتلرين ساخلانديغي قفسلر سيراسي. جيرولامو حيجان‌لا آناسينا دئدي:

- آنا، بالاجا قارا قريفون (بالاجا، قارا توکلو ايت جينسي) آلتميش سايلي قفسده ايدي.

آناسي اونا جاواب وئرمه‌دي، او، آتايا طرف چئوريليب دئدي:

- خيدمتچي‌ني تاپماق لازيم‌دير. ساري‌شين بير اوغلان‌دي. بيز ده گئدک ايتلره باخاق.

آتا سيقارئت يانديريب ايداره بيناسينا طرف اوز توتدو. آنا ايسه اوغلونون اليندن ياپيشدي، بيرليکده قفسلره طرف گئتديلر.

حَيَط زهملي، عيني زاماندا شوبهه‌لي بير سوکوتا غرق اولموشدو. هاوادا يونگولجه دويولان حئيوان قوخوسو سانکي هيجانلي بير اينتيظاردان خبر وئريردي. آنجاق جيرولامو و آناسي ائله بيرينجي قفسين قارشيسيندا گؤرونموشدولر کي، اول ايتلردن بيري، سونرا ايکيسي، داها سونرا اوچو، نهايت، ايتلرين هاميسي بير آغيزدان هوروشمه‌يه باشلادي. جيرولامو حيسس ائتدي کي، هوروشلر موختليف جوردور، ائله همين سسلري چيخاران ايتلرين اؤزلري کيمي- کسکين زينگيلتي‌دن توتموش، درين، قولاق‌باتيريجي هوروشه قدر. آنجاق اونا ائله گلدي کي، بو قاريشيق سسلر خورونو هانسيسا عومومي بير نوت بيرلشديريردي: سون درجه آنلاشيقلي اولان، اورک‌سيزلاديجي بير يالواريش نوتو. او، دوشوندو کي، بوتون بو هوروشلر اونا عنوانلانيب، اونا گؤره ده يوبانمادان سئچديگي ايتي گؤتوروب اورادان گئتمک ايسته‌دي. آناسي‌نين قولوندان ياپيشيب بير ده تکرار ائتدي:

ادامه نوشته

كؤچورمه 23

 

مينه رولوگييا (كاني‌شناسي) كيتابي

يازار: قان تورالي

كؤچورن: عيوض بيات

بيلميرم كي، چوخ چكمه‌يه‌جك بو هيجران. بير گون سن قاييداجاقسان و منيم اولاجاقسان. يازديغيم شعرلر ده بونو دئييردي، سنين منه باخان آمیرانه باخيشلاري‌نين دا آرديندان گؤروردوم بو ويصالي. هر دفعه «يوخ» جاوابي‌نين آرخاسيندا بئله گله‌جه‌يي گؤروردوم. بو گله‌جك بيرگون بيزيم اولاجاقدي. سنين و منيم.

بيرجه قورخوم واردي سن ساري‌دان. بيليرديم، منده بو عينادكارليق وارسا سن گؤزل گونلرين بيرينده منه «هه» دئيه‌جكسن. بلكه ده بو «هه» اولماياجاقدي، آما سن بير گون يوخ'و ائله دئيه‌جكدين كي، «هه» كيمي چيخاجاقدي. آما قورخوم اوندايدي كي، سن اولو يارادانا اينانماياجاقسان، اونو اينكار ائده‌جكدين، او زامان من سئچيمي سندن يوخ اوندان يانا ائده‌جكديم. آما بوتون نامازلاردا آللاها دوعا ائديرديم كي، مني بئله سيناق قارشسيندا قويماسين. ايلك گؤروشوموزدن سن منه دئدين كي، ناماز قيلماق ايسته‌ييرسن. بيليرديم، ربّيمي سئچه‌جكديم، آما آللاها قازانسام دا سني ايتيرمك ايسته‌ميرديم، آللاه سئوگيسي نه قدر خوش ايدي‌سا سني ايتيرمك سعادتي او قدر آغير ايدي. ياخشي كي، آللاه مني بئله بير سيناق قارشيسيندا قويمادي. شوكورلر اولسون.

صاباحا قدر سني دوشونوردوم، كاغيذلار يازيب كيتابلارين آراسينا قويوردوم، او كاغيذلاردا سنين آدين يازيلي ايدي. مينه‌رولوگيا ايمتاحانينا حاضيرلاشاركن كيتابين آراسيندا سنين آدينين چيخماغي او قدر خوش ايدي كي.

سني بئله سئويرديم...

قولامعلي دوشونجه‌لردن آيريلدي. آرتيق اوتوبوس باكي‌يا چاتيردي. بو اوتوبوس اونو سئوديگينه طرف آپاريردي. پنجره‌دن چؤله باخدي. كاپيتاليزم اينكيشاف ائتديكجه يول قيراغينداكي چؤله بنزر يئرلرده ده حيات قايناييردي. آما يول قيراغيداكي فاحيشه‌خانالار داها چوخ پرولتاريايا خيدمت ائديردي. واقت‌آشيري تئلويزيونلاري بوردا عادي بير مديرين، يا دا اينشاعات فهله‌سينين 3- 4 گونلوك قازانجيني بير نئچه ساعاتا نئجه خرجله‌مه‌سي حاقدا سانباللي رئپورتاژلار حاضيرلاييردي. قولامعلي ايچين فاحيشه ان پيس آدام ايدي. اونلارا دادانان فهله‌لره ده ائله. اوشاق واقتي بير رومان اوخوموشدو. عموميت‌له سون ايللرده چوخ آز رومان اوخويوردو. اساس مطالعه‌سي ديني كيتابلار ايدي. «قلبين زمرد تپه‌لري» اوخودوغو ان سون كيتاب ايدي، بوردا كؤنول عالمينه يولچولوقلا اينسانين اؤز اوره‌گيني نئجه پاكلاشديرماغينا عاييد توتارلي شئي‌لر واردي. باخ، ائله ايندي بو فاحيشه‌خانالاري دوشونمه‌يي اونون ايمانينين كاميل اولماديغينا توتارقا ايدي. مؤمن اينسان بئله شئي‌لري دوشونمه‌مه‌لي ايدي. اوشاق واقتي اوخودوغو كيتابدا بير دنيزچي‌نين آلتي آيليق سفردن سونرا فاحيشه‌خانايا گئمه‌سي و اوردا اؤز باجيسينا راست گلمه‌سيندن بحث ائديردي. ائله بيليردي كي، فاحيشه‌خانايا گئتسه اوردا باجيسيني گؤره‌جك.

ادامه نوشته

كؤچورمه 15

من، سن، او  و تئلفون

یازا: آنار رضا

کؤچورن: رقیه کبیری

تئلفون نومره‌لری

اوخشاماز بیر-بیرینه

اما هامیسیندا اینسان سسی...

...پیس گون‌لر

اوخشاماز بیر-بیرینه

بیرینده اؤزون سوسارسان

بیرینده تئلفون.                       واقف وکیل‌اف

دونن سنین تئلفونون اؤلدو. اؤلن، یالنیز آدام‌لار اولمور کی... تئلفون نومره‌لری ده اؤلور. عؤمرون بویو چوخ رقم‌لری اونوداجاقسان: پاسپورتونون نومره‌سینی، آخیرینجی ایشینده آلدیغین آيليغيني، دوستونون آراباسينين نومره‌سینی، آیا قدر اولان مسافه‌نی، یاشادیغین شهرین اهالی‌سینین سایی‌سينی. باشقا رقم‌لری. هامیسینی اونوداجاق‌سان. بیرجه بو بئش رقم‌دن ساوایی. بو بئش رقم، اؤزوده محض بو آردیجیل‌لیقدا سنین اوچون ان عزیز هدیه ایدی. بئش رقم، اونون سسی و تئلفون دسته‌ییندن گلن بنؤشه عطری.

بعضاً من قارا تئلفونون دسته‌یینی ائله قالدیریردیم، ائله بیل رویالین قاپاغینی قالدیریرایم. بعضاً بو قارا دسته‌یی ائله قویوردوم، ائله بیل تابوتون قاپاغینی اؤرتورم.

ایندی بو نومره یوخدور. يعنی کی، وار، اما منیم ایچين یوخدور. منیم ایچين بو نومره ایندی یاساق يئردير. بارماغیمین آلتیندا، تئلفون دایره‌سینده یئرله‌شن بو بئش رقم، ایندی منیم ایچين کئچیلمز بیر مسافه‌دیر. -کیلومترلر، میل‌لر، فرسخ‌لر.- من بو مسافه‌نین بئش‌ده دؤردونو کئچه بیله‌رم- دؤرد رقمی ییغا بیله‌رم. اما هئچ واخت سون رقمی -بئشینجی‌نی- توماياجاغام. سنین نومرن باغلی قاپی‌دیر، آچارینی ایتیرمیشم.

سنی گؤرمه‌یه ده بیلردیم. زنگ ائدیردیم، سسی‌نی ائشیدیر و دئییردیم: عزیزیم، الین نيیه بئله سویوق‌دور؟

سنی گؤرمه‌یه ده بیلردیم، اما مسافه‌دن بئله دویوردوم. ساحیل کندلرینین ساکین‌لری دنیزی گؤرمه‌ینده بئله، اونو دویدوقلاری کیمی.

ادامه نوشته

چئویرمه 4

قارا قويون

ايتالو كالوينو

چئويرن: عيوض (ائيواز) بيات

بير زامانلار بوتون ياشايانلاري اوغرو اولان بير اؤلکه واريدي. گئجه‌لري هرکس بير فنر (فانوس) و بير دسته آچار ايله سيلاحلانيب، قونشولاري‌نين ائوينه گيرردي. هاوا ايشيقلانارکن چوواليني دولدوروب گري دؤندويونده اؤز ائوي‌نين ده سويولموش اولدوغونو گؤرردي. بئله‌جه، هاميسي شادليقلا بيرليكده ياشاييرديلار، هئچ كيمين ده دورومو چوخ پيس دئييلدي. بير بيريني سويوردولار؛ او، اوبيريني سويوردو، اوبيري ده اوبيري‌سيني. بئله‌ليكه بو سويماق سون اينسانا قدر گئديردي، سونونجو دا، بيرينجيني سويوردو. بو اؤلکه‌ده آل- وئر ده بئله گئچينيردي. ايستر آليجي اولسون يا دا ساتيجي.

حکومت ده، اينسانلاردان چالماق ايچين چاليشيردي و قورولموش بير سوچ اؤرگوتويدو، اينسانلار دا بوتون زامانلاريني حکومتي آلداتماقا چاليشيرديلار. ياشام هئچ بير سورون (مسئله) چيخمادان سوروردو؛ اوردا ياشايانلار نه زنگين‌ديلر نه ده يوخسول. سونرا بير گون- نئجه اولدوغونو کيمسه بيلمير- دوز ياشايان بير آدام شهره گلدي و اوردا ساكين اولدو.

ادامه نوشته

كؤچورمه 14

اورکده‌کي يانيق

كؤچورن: عيوض (ائيواز) بيات

گنج قيز، ال آيناسيندا ماکياژيني[1] کنترل ائتدي؛ «چوخ گوزل» دئدي. گوزلليييندن اميندي. يان- يؤره‌سينده‌کي اوغلانلارين پروانه اولماسيندان[2] ذاتن بيليردي گوزل اولدوغونو. حاياتين داديني بيلب، راحات ياشايانين بيري‌ايدي.

جئب تئلفونو چالديغيندا، آخشام يولداشلارييلا هانسي ايلَنجه (تفريح، سرگرمي) يئرينه گئده‌جه‌يينه قرار وئرمه‌يه چاليشيردي. تئلفونداکي نومارايا باخدي، آرايان آناسي ايدي.

- آلو... قيزيم، نئجه سن؟

- ياخشي يام آنا. نه اولوب؟

- سنه بير سورپريزيم وار.

- سورپريز مي؟

- هه. چوخ اسکي[3] بير يولداشيم، دوستوم شهريميزه گلميش... .

- ائي. کيمميش؟

- کيم اولدوغو سورپريز. فقط، اونو سنين گتيمه‌ييني ايستيرم.

- من؟

---

[1] - makyaj= بزك، آرايش چهره.

[2]- pervane olmak= پايبند شدن.

[3]- چوخدانكي، قديم دوستوم

ادامه نوشته

كؤچورمه 13

واريم

يازار: Alev Demir

كؤچورن: عيوض (ائيواز) بيات

 ۲ مین ایلینده سئوگي باغچاسي‌نين اؤدوللو ياريشماسيندا بيرينجي‌لييي آلان يازي.

ساعاتلاردير بيلگي‌سايارين باشيندا اوتوروردو، هله بکله‌دييي «مئيل» گلمه‌ميشدي. سيلکيندي. نئچه ساعات اولموشدو بيلگي‌سايار باشينا اوتورالي؟ اوووو! ايکي ساعاتدان يوخاري اولموش، فايداسيز ايکي ساعات. يولداشلاري يئمه‌يه چاغيرميشدي، «سينان» سينمايا، اودا يولداشلاري ايسه فال پارتيسينه... هئچ بيريني قبول ائتمه‌ميشدي. ايندي بو اوزاق اينترنت كافه‌ده گله‌جک او مئيلي گؤزلوردو. داها نه قدر سوره‌جکدي؟ کيم بيلير بلکه، بوگون حسابينا گيرمه‌ميشدي، گيرمه‌يه‌جکدي؟ گيرسه ده يازاجاغي داها اؤنملي اينسانلار واردي بلکه... بلکه ده اونون اونا اؤنم وئردييي كيمي او، اونا اؤنم وئرميردي؟ يوخ جانيم!

او دا ان آز سئوگي قدر دَير وئريردي سئوگي‌يه، يازديغي هر مئساژين قارشيليغي ائرته‌سي گونه گلير، ايندي ائرته‌سي گون اولمادي بير نئچه گون ايچينده گئجيکمه‌نين اؤزورونو ده ايچينده يازان مئيل حسابيندا بکليردي سئوگي‌يي. آيلار اولموشدو يازيشمايا باشلايالي، بير داها بئله آخساماميشدي مئيل‌لر. تا کي، بو هفته‌يه قدر. هفته باشيندان بري تک بير ساتير گلمه‌ميشدي اوندان. حئيران‌ايدي! اويسا اؤزو يازاجاق بير شئي بولاماسا - کي، بو دا آيدا ايلده بير يول اولوردو- فوروارد ائديلميش مئساژلار گؤنده‌ريردي، گوزل سؤزلر، گولمه‌جه‌لر يا دا خيردا بير اي- کارت.

ادامه نوشته

چئویرمه 3

فيكيرين گوجو

بو یازینین دا یازارینی بیلمیرم. آنجاق من بونو فارسجادان چئویرمیشم.

«مينه سوتا» دا قوجا بير كيشي، يالنيز ياشيردي. ايستيردي يئرآلما اكدييي يئريني شوخوملاسين آما بو ايش اونون ايچين آغير بير ايش‌ايدي. تكجه اونا يارديمجي اولان اوغلو دا دوستاقدايدي. قوجا كيشي اوغلونا بير مكتوب يازدي و دورومونو اونا آچيقلادي.

«اوغلوم، بونا گؤره كي بو ايل يئرآلما اكه بيلمه‌يه‌جم، ياخشي گونوم يوخدو. ايسته‌ميرم بو يئري الدن چيخاردام. بونا گؤره كي آنان، اكين واقتيني هر زمان سئوردي. من يئر اوستونده ايشله‌مك ايچين چوخ قوجايام. سن بوردا اولسايدين‌سا، بوتون ايشلر دوزه‌لردي. بيلميرم سن بوردا اولسايدن، يئري شوخوملاماقدا منه يارديم اولاردين؟

بوتون سئوگي‌لرله، آتان.»

آتاسي بو تئلگراف الينه يئتيشدي:

«آتا، آللاها گؤره يئري شوخوملاما، من اوردا سيلاح گيزلتميشم.»

صاباسي گون، سحر تئزدن ساعات 4 ده، 12 "اف بي آي" مامورو و محلي پوليس گلیب و بوتون يئري شوخوملاديلار، آما سيلاح تاپا بيلمه‌ديلر.

قوجا كيشي، شاشقين قالاراق، آيري بير مكتوب يازدي اوغلونا و اونا دئدي كي نه ايش اوز وئردي.

اوغلو جاواب يازدي: «آتا جان گئت و يئرآلمالاريني اَك. اليمدن گلن اَن ياخشي ايشي‌ايدي كي سنين ايچين ائله‌ديم. دونيادا باغلي اولان قاپي يوخدور، يا بير يول تاپاجام، يادا بير يول آچاجام.»

چئویرمه 2

تانري يا مكتوب

بو یازینین یازاری بللی دئییل. آنجاق من بونو فارسجادان چئویرمیشم.

بير گون، آدرئسلري بيلينمز يئرلره يوللانان مكتولارا يئتيشن پست ايشچيسي، بير پاكئت گؤردو. اونون اوستونده تيترك ال‌ايله يازيلميشدي: تانري يا مكتوب.

اؤز اؤزونه فيكيره دالدي. ياخشيسي بودور كي مكتوبو آچيب اوخويوم. بير آن سونرا اونو آچدي. مكتوبدا بئله يازيلميشدي:

«عزيز تانريم، 83 ياشلي اري اؤلموش بير قادينام. ، آز اولان ايش بيتيردييم (بازنشستگي) حوقوقويلا، ياشاميمي گئچينديريرم. دونن بيريسي منيم كيفيمي اليمدن قاپدي قاچدي. اونون ايچينده 100 مين پول واريدي. بو منيم بوتون پولوم اويدو كي آیین باشينا قدر گرك اونلا گئچينه ايديم. گلن هفته بايرامدي و من ايكي يولداشيمي شاما چاغيرميشام آما او پول اولماسا، من بير شئي آلا بيلمه‌رم. كيمسه ده يوخومدو اوندان بورج ائلييم. اي باغيشلييان اللاه منه يارديم ائت.»

پست ايشچيسي چوخ ائتكيلندي و مكتوبو باشقا امكداشلارينا گؤستردي. سونوندا بو قرارا گلديلر كي جئبلريندن پوللاريني چيخاريب ماسا اوستونه قويسونلار. بو ايشي گؤردوكده 96 مين پول ييغيلدي. اونو بير پاكئته قويوب، قوجا قادينا يوللاديلار. پست ايداره‌سينين بوتون ايشچي‌لري، كيمسه سيز بير قادينا يارديمجي اولمالاريندان سئوينديلر.

بايرام سونا چاتديب و نئچه گون بو ايشدن گئچميشدي كي آيري بير مكتوب قوجا قاديندان يئتيشدي. اوستونده يازيلميشدي: تانري يا مكتوب. ايچينده بئله بير سؤز يازيلميشدي:

«عزيز تانريم. سنين بو منه گؤردوگون ايشدن نئجه تشكور ائلييه بيله‌رم. سنين باغيشلاماقليغينلا، من يولداشلاريما مكمل بير شام حاضيرلاديم و اونلارلا ياخشي بير گون گئچيرديم. من اونلارا دئديم كي سن منيم ايچين نه گؤزل بير بايرامليق وئريبسن. البت كي 4 ميني آزيدي و امينم كي اونو دا پست ايداره‌سينين ايشچي‌لري گؤتوروبلر.»

فارسجا دان چئویرن: عیوض (ائیواز) بیات 

چئویرمه 1

قار آدامي

یازار: اسلاوومير مروژك

چئويرن: عيوض (ائيواز) بيات

او ايلين قيشيندا چوخلو قار ياغدي. كؤيون اوشاقلاري ييغيليب قار آدامي دوزلتديلر. كؤشه‌نين مئيداني چوخ بؤيوك ايدي و چوخلاري اوردان گئت- گلده ايدي. بير سيرا دؤلتي ايداره‌لرين ده ‌پنجره‌لري اونا ساري آچيليردي. بو پنجره‌لرين داليندان، مئيدان چوخلارينين گؤزونون اؤنونده ايدي.

محله‌نين نئچه اوشاقي كي باجي- قارداش ايديلار، هاي- كوي سالاراق، دوز مئيدانين اورتاسيندا گولمه‌لي بير قار آدامي دوزلتديلر. اؤنجه بير قار گول‌له‌سين يئرده ديغيرلاديب، بؤيوتدولر. بو اولدو قار آدامينين بدني (هئيكلي). سونرا آيري بير قار گول‌له‌سي ديغيرلاديب، اونو بدنين اوستونه قويدولار. اوچونجوسونو ده اونون اوستونه قالديرديلار. اودا اولدو قار آدامينين باشي. نئچه تيكه كؤمور ده باشدان- آياغا و بير سيرادا قار آدامينين بدنينه ياپيشديرديلار. اولاردا دويمه يئرينه ايشلنديلر. اوزونون اورتاسينا دا قيرميزي بير يئركؤكو اكديلر، بورون يئرينه. قار و قار آدامي اوشاقلار ايچين سئويملي ايدي. بو قار آدامي، مينلرجه قار آدامينا اوخشادي كي قار ياغاندا، بيزيم اؤلكه‌نين آيري يئرلرينده ده دوزه‌لير. مئيداندان گئت- گلده اولان آداملارين چوخو، قار آدامينين قارشيسيندا دوروب، حسرتله اونا باخيرديلار و اوشاقلاري آلقيشلاديقدان سونرا يوللارينا داوام.

پنجره‌لري مئيدانا آچيلان ايداره آداملاري دا اؤز ايشلري‌له باشلاري قال ايدي. اوشاقلارين آتاسي، بالالارينين اويناماسيني گؤردوكجه سئوينيردي.

ادامه نوشته

كؤچورمه 12

اوميد

يازار: احمد اونال جم

كؤچورن: عيوض (ائيواز) بيات

 قيرخ ياشلارينداکي آدامين اللري قوينونا گئتدي، تر- تله‌سيك  قوينوندان چيخارديغي کاغيذي يينه همن ياشلارداکي آيري آدامين اللرينه قويدور. قارانليق كوچه‌ده يالنيزديلار آما قورخويلا يان- يؤره‌سينه باخدي، سونرا فيسيلدادي[1]؛

- قارداش گئدر دئييل مي؟

- مراک ائتمه[2] سن، اؤز اللريمله بويوک ائلچيلييه وئره‌جه‌ييم.

گولومسه‌مه‌يه چاليشدي، آغزيندا ديشلري‌نين نرده ايسه ياريسي يوخدو.

- هرحال خبرلري يوخدور. يوخسا بيزه يارديم ائدرديلر، دئييل مي؟

- يوخ دئديم يا..، منيم گئتمه‌ديييم اولکه قالمادي نرده ايسه. اورالارا دا گئتديم. کيمسه‌نين خبري يوخ.

- کاغيذي يئتکيلي‌لره[3] وئررسن قارداش، سنده سؤيلرسن نه‌لر چئکديييميزي.

تورکجه‌يي ياخشي دانيشان روس گنج تَلَسدي؛

- تامام. تامام. ياخالاناجاييق[4] تئز پاراني وئر.

آدام يئني خاطيرلاميش كيمي قوينوندان ايللرجه ييغيشديرديغي پاراني چيخاردي.

- آل. آجيق، ايش تاپا بيلميرم. آما بو ايش ايچين حلال اولسون آل.

گنج روس پارايي سايارکن، او آنلاتمايا داوام ائتدي،

- چينليلر بيزي آج قويور، ايشسيز قويور. بير اوشاقدان چوخو ياساق، ايشسيز اولانلارين اوشاقلاري اولماسي دا  جزالانديريلير. اوغلانلاريميز، اونلارين قيزلارييلا ائولنه بيلمير آما اونلار توپراقلاريميزا صاحيب اولماق ايچين، بيزيم قيزلارلا زورلا ائولنيرلر. بعضيلريميز، هئچ اولمازسا قيزلاري آج قالماسين دييه ائولنديرير.

---

[1]- دوداق آلتي دانيشماق. ياواشجا دانيشماق.

[2]- نگران اولما.

[3]- yetkili= صلاحيت دار، اختيار دار.

[4]- توتولماق، گيره گئچمك.

ادامه نوشته

كؤچورمه 11

اوشاق

يازار: Cüneyt Suavi

كؤچورن: عيوض (ائيواز) بيات

گنج قادين، اوشاغين گوزل‌لييي قارشيسيندا بويولنميش[1] كيمي ايدي. قيويرجيق (فير، مجعد) ساري ساچلاري، ايري ماوي گؤزلري، قالخيق بير بورون و كيچيك قيرميزي دوداقلارييلا بير کارت پوستالي آنديران اوشاق، قادي‌نين ايندي‌يه قدر گؤردويو اَن جانا ياتان قيز اوشاغي‌ايدي. اونون ايپک ياناقلاريني دويا- دويا اؤپمک و جنّت قوخوسونو ايچينه چئکمَک ايچين ائييلدييينده: "توخونما منه ..." دييه بير سئس ائشيتدي.

"مني اوخشامايا حقّين يوخ سنين..." قادين قورخويلا ايرکيليپ (ديسكينيب) يان- يؤره‌سينه باخدي. اوشاقلا اؤزوندن باشقا، ايچه‌ريده کيمسه يوخودو. همن سسي تکرار ائشيتدييينده اوشاغا دؤندو.

آمان آللاهيم!... يئني دوغموش كيمي گؤرونمه‌سينه باخماياراق، دانيشان اوييدي. "منه ياخينلاشماني ايسته‌ميرَم"  دييه دوام ائتدي. "تئز اوزاقلاش مندن..."

قادين، بيراز اولسون اؤزونو يامانلاياراق: "اوشاقلاريميز هاميسي اوغلان اولور" دئدي. "اونلار دا گوزل آما قيز اوشاقلاري باشقا. بونا گؤره سني اؤپمک ايسته‌ديم."

"مني اؤپه بيلمزسن" دييه آغلامايا باشلادي اوشاق. "منيم ده سني اؤپمييَجه‌يييم كيمي... "

"نَدن ؟" دييه سوروشدو قادين. "نَدن اؤپمَزسن کي؟"

اوشاق، ايشقيرقلارا (سكسكه) بوغولورکن: "بونون سبب‌ايني بيلمه‌يين گرَكير (لازم گؤرسه‌نير)" دئدي. "فيكيرلش‌سن حتمن تاپاجاقسان..."

قادين، نه‌لر اولوب بيتديييني خاطيرلاماق حاليندا اؤزونه گلدي. اؤزل بير خسته‌خانانين ان لوکس اوتاغيندا ياتير و نارکوزون (بيهوشي داواسينين) تاثيريندن معده‌سي بولانيردي. عائيله‌وي دوستلاري اولان تانينميش دوکتور، اوتاغي دولدوران چيچکلردن بيريني وازودان[2] (گلدان دان) چيخارديب قادينا اوزاديرکن: "گئچميش اولسون خانيم افندي" دئدي. "باشاريلي بير کورتاژدي دوغروسو. هه...! دوغرودان، "قيز"ميش آلديرديغينيز اوشاق. "

---

[1]- büyülenmek= مسحور شدن، جادو شدن

[2]- vazodan

كؤچورمه 10

 

قیرمیزی آرابا

یازار: Bonita L. Anticola
Çeviren : Nuray Bartoschek

کؤچورن: عیوض (ائیواز) بیات

يولداشيم «گايله» دؤرت ايلدن بو يانا کانسئره[1] قارشي ياشام موجاديله‌سي وئريردي. آيري يولداشلاريملا بيرليکده اونو گؤرمه‌يه گئتديييميز بير گون، اوشاقليق رويالاريميزدان سؤز آچميشديق. گايله باشيني پنجره‌يه دوغرو چئويردي. گؤزلري چوخ اوزاقلاردا، سسي سيتم دولو "من، کوماندالي، قيرميزي بير اويونجاق آرابامين اولماسيني ايسترديم هر زامان، آما دوغوم گونومده نه ايسته‌ديييمي سؤيلرسَم؛ ديله‌ييمين گرچك اولماماسي قورخوسويلا هئچ کيمسه‌يه سؤيله‌مَميشديم بونو. بو ندن‌له ده(دليله گؤره‌ده) آصلا راديولو، قيرميزي بير اويونجاق آرابام اولمادي." دئدي.

گايله‌نين گؤروشوندن بير نئچه گون سونرايدي. چوخ سئوديييم دوندورما[2]يي آلماق ايچين سيرادا (صف‌ده) گؤزلرکن بيردن دوندورماجي‌نين ويترينينده‌کي قيرميزي اويونجاق آراباني گؤردوم.

يانينا دا بير يازي ايليشديريلميشدي: "دوندورمانيزي آليرکن وئره‌جَييميز کوپونو دولدورمايي اونوتمايين، بلکه ده چئکيليش(قرعه‌كشي) سونوندا بو کوماندالي آرابا سيزين اولابيلير."

---

[1]- kanser= سرطان

[2]- بستني

ادامه نوشته

كؤچورمه 9

قوجا چؤپچو

يازار: Ahmet Ünal Çam

كؤچورن: عيوض (ائيواز) بيات

قوجاليغا آديم آتالي چوخ اولموشدو. گؤزلري دالغالارا تاخيلميش حالدا، اييي- کؤتو (ياخشي- پيس) يؤنلرييله گئچميشي دوشونوردو. اينسانليغا قارشي چوخ گووه‌ني قالماميشدي. ياخشي‌ليق ائله‌ديكجه، پيس‌ليك گؤردويونو دوشونوردو. اؤزونه، چوخلو اينسانلارين "سفئح[1]" گؤزويله باخديغيني دا بيليردي. فقط قارشيليقسيز ياخشيليق ائله‌مكدن واز گئچميردي. چونکو اؤزونو حاياتا باغلايان چوخ آز باشقالاريندان بيريسي ده، اؤزونه اولان سايغيسييدي (احترام‌ايدي). اونو دا الدن وئررسه، هرشئييني الدن وئرميش اولاجاغيني دوشونوردو.

قوجا آدام قاياليقلارين اوزه‌ريندن ياواشجا دوغرولدو، دنيزين قيراغينا آتيلميش سينيق ايچکي شيشه‌سي گؤزونه ساتاشميشدي. ايچکي ايچمزدي آما گؤروب ده گؤتورمزسه و بو سينيق شيشه بيرينه ضرر وئريرسه ويجدان عذابي دوياجاغيني دوشوندو. اونون شيشه‌ني يئردن آلديغيني گؤرن بيري قيز، بيري اوغلان ايکي گنج گولوشدو. اوغلان؛ "- چؤپچو[2]دو هرحالدا." دئدي. قوجا آدام هرکسي ياخشي گؤرمه‌يه چاليشيردي، اؤزلليک‌له گنجلري آما يئنه ده گنجين، اؤزو حاققيندا يولداشيلا شخلوق ائليركن بيراز سسيني آلچالتماماسينا، اؤزونون دويماماسي ايچين غيرت ائتمَمه‌سينه جاني سيخيلميشدي.

---

[1]- enayi= احمق، سفئح، سادله لوح.

[2]- سوپور، رفته‌گر.

ادامه نوشته

كؤچورمه 8

«آنکارادا يئديم تازه ميوه‌ني» توركوسونون ياراديلماسي

كؤچورن: عیوض (ائیواز) بیات

آنکارانين کسکين ايلچه‌سي‌نين[1] «جين علي» کؤيونده 1924 ايلينده سفر آديندا بير اوغلان اوشاغي دوغولور. ايلک‌اوخولو[2] کؤيونده اوخويان سفر، 15 ياشيندان سونرا عائيله‌سي‌نين توم رنجبرليک ايشلرينه يارديم ائتمه‌يي قبول ائلير. گوجلو و قووتلي‌دير سفر. کؤيده هرکس طرفيندن سئويلير. 20 ياشينا گلينجه ده «سئيفلي» کؤيوندن خديجه‌ني ايسته‌يير. سؤز کسيلير، دويون اولور ائولَنيرلر. آرادان اوچ آي گئچينجه، سفر اينجه خسته‌ليک دئييلن وَرَمه توتولور. دوکتورلار بير چاره تاپا بيلميرلر. تا آنکارالارا گؤتورولور و 20 ژوئن 1944 ده غريب سفر اؤلور. آشاغيداکي تورکو سفر ايچين ياکيلميشدير.

آنکارادا يئديم تازه ميوه‌يي

بوشا چينه‌ميشيم يالان دونيايي

کسکين‌دن ده سيلديرمه‌يين کونيه[3]‌يي

سؤيله‌يين آناما آنام آغلاسين

آنامدان باشقاسي يالان آغلاسين.

آردی وار

ادامه نوشته

كؤچورمه 7

اومودلاريميزين هئچ توكَنمه‌سينه ايناناق

ایستانبول توركجه سيندن كؤچورن: عيوض (ائيواز) بيات

فارس سولطاني ايكي آدامي اؤلومه محكوم ائتميشدي. محكوم‌لاردان بيري، سولطان آتيني نه قدر سئودييني بيليب و حاياتيني باغيشلارسا، بير ايل ايچينده آتا اوچماق اؤيره‌ته بيله‌جَگيني سويله‌ميشدي.

اؤزونو، دونياداكي تك اوچان آتا مينَركن خييال ائدن سولطان بونو قبول ائتميشدي. او بيري محكوم اينانمايان گؤزلرله يولداشينا باخيب و «آتلارين اوچماديغيني بيليرسن. نه اولوب كي دلي‌لر كيمي بئله بير فيكيرله اورتايا گيريرسن؟ يالنيزجا اؤلومونو بير ايل گئجيكديريرسن.» دئميشدي.

«اؤيله دئييل» دئدي بيرينجي محكوم. «اؤزومه دورد اؤزگورلوك (آزادليق) شانسي وئريرَم:

بيرينجي: سولطان بو ايل اؤله بيلير.

ايكينجي: من اؤله بيليريم.

اوچونجو: آت اؤله بيلير.

دؤردونجو: بلكه آتا اوچمايي اؤيَرده بيلديم!»

كؤچورمه 6

تاکسي

يازار: احمد اونال چم

كؤچورن: عيوض (ائيواز) بيات

تاکسي‌سي ايله جادا ايشيقلاري آلتيندا يول آليردی. «ايکي-اوچ موسافیر داها بولورسام ائوه دؤنوب یاتاجاغيم.» دييه دوشوندو، يورقوندو. تاکسي‌سينه بيرآن سئوگييله باخدي، ميريلداندي؛ «چؤرك آختاران» گؤزو اؤنجه يولدا سيزميش بير سرخوشا سونرا دا زيبيل‌لري قاريشديران بيرينه تاخيلدي. اؤزونو اونلا قيياسلادي سئويندي؛«اييي‌سن، اييي‌سن!»

ساعاتينا باخدي، بير اوف چئکدي، «بير موسافیر چيخسا آرتيق، بوشونا دولانيب دورورام.» ائرته‌سي گون آبيسينین[1] یانینا گئده‌جکدي، تئز قالخاجاغي ايچين، ائوينه تئز دؤنمک ايستييیردی. فقط هرشئي اينسانين ايسته‌ديیي کيمي گئتميردی کي. ايچينده خفيف بير اؤفکه ايله آبيسيني دوشوندو؛ «آه!... آبي، بيراخمادين بو قوماري، بورجلانيرسان، طبیعی‌کی ياخانا ياپيشير تفه‌جيلر[2].»

---

[1]- آبی=بؤیوک قارداش

[2]- ربا خوار، نزول خوار

ادامه نوشته

كؤچوردویوم 5

آياق‌قابي

يازار:AHMET ÜNAL ÇAM

كؤچورن: عيوض (ائیواز) بيات

 سانکي گله‌جک آي گؤيدن پارا ياغاجاق. هم ائو صاحیبيم ده زنگين بيري ساييلماز کي. کيمسه‌دن بورج ايستَمه‌يه ده اوزوم قالمادي. 20 ميليون دا کيرايه وئرينجه الده 10 قالاجاق، باققال آرتيق گؤزله‌مز، 5 ده اونا. قالان 5 ده بير هفته يئتر. سونرا دا ...". «آدام» ائوينه دؤندو. ايچه‌ري گيردي، سيخينتيلاريني اولابيلديي‌جه عائيله‌سينه يانسيتمايان بيري ايدي. اوزونده‌کي سيخينتيلي ايفاده‌يي زورلا دا اولسا دئييشديردي، گولر اوزله ايچه‌ري سسلندي؛

- سلام . . . کيمسه يوخ مو؟ بو يورغون و ياشلي آدامي قارشيلاياجاق کيمسه يوخ مو؟

خانيمي قاچاراق گلدي، ژاکئتيني آلدي؛

- قوسورا باخما بئي، گلديگيني دويماديم.

- اه، اليميز بوش اولونجا اوزوموزه باخيلمير، نه ائيله‌ييم.

- اؤيله دئمه بئي.

- شوخلوق ائله‌ديم جانيم، شوخلوق ائله ديم، ناراحات اولما. . . اليم دولو اولسا دا اوزومه باخيلمير، دييه جکديم!

ادامه نوشته