عؤمرومون 10 ايلي

شبنم حسنعليزاده

حسرتله باهارين گليشيني گؤزله‌ييرم. او باهاري کي، دمير بارماقليقلار آراسيندان آنجاق طراوتيني، نفسيني دويا بيله‌رم. او باهاري کي، بوردا قادين دولو و هر طرفدن بير سس گلن، هر اورک‌دن بير درد بؤلوشولن، آما يئنه ده بو سس دولو ظلمت سس‌سيزليک‌ده، ائله همين بو دمير بارماقليقلار آراسيندان قوشلارين شَن جيکگيلتي‌سيني ائشيده‌جه‌يم. او باهاري کي، هله 9 ايل بئله‌جه گؤزله‌يه‌جم.

بو گون دوز 1 ايل کئچير اللريمه قانداللار تاخيلان او گوندن، آما هله ده گؤزلريمين اؤنوندن گئتمير حؤکمون اوخونان او آن. 4 طرفيمده محکمه ديوارلاري، قارشيمدا منه مني جللادميشام، غدارميشام کيمي گؤسترن، سويوق باخيشلي حاکيم، بير طرفيمده لئهيمه، اوبيريم‌ده ايسه عليه‌ايمه اولان وکيللر، آرخامدا ايسه نئچه- نئچه مني قينايان، منه نيفرتله باخان، منه توپورن گؤزلر... من نئجه ده يالقيزيميشام، آي آللاه! هئچ کيم مني دينله‌مه‌دي، آنلامادي، هئچ کيم منه اينانمادي.

اوف‌ف‌ف... اوف پول، پول، پول... ديليم اوتانا- اوتانا بوينوما آلير کي، نه قدر بؤيوک گوجه صاحیب‌دير بو بالاجا کاغيذ پارچاسي. ضعيف، يونگول اينسانلارين، اوستونده نئجه ده آغاليق ائدير پول، اؤز قوللاريني آغا گؤستره‌رک.

اَه‌ه...، باشلاديلار دانيشماغا يالانچي شاهيدلر، يئکه‌قارين وکيل‌لر. آما من هئچ کيمي ائشيتميرديم. دهشت‌دن بَرَلميش، آجيدان ياشارميش گؤزلريم‌له باخيرديم اطرافيما و دوشونوردوم: آمان آللاه گؤزلريمين اؤنوندن نئجه ده آخير حياتيم. بو گوجلو گؤرونن، اؤزلريني عاغيللي، دوغرو سايان اينسانلارين آراسيندا دئمه بيرجه منم‌ميش ضعيف گؤرونسم‌ده اصل گوجلو، دوغرو اولان. چونکو عمليم‌دن پئشمان دئييلم، آلنيم آچيق، اوزو آغ باخيرام قارشيمداکينا، بوينوم بوکوک دئييل.

گؤرن، ندير ناموس؟ وحشي بير پنجه‌نين و يا ديشين قاباغينا آتيلاجاق يئم‌مي، بير توز قدر دَيَري اولمايان گَرَک‌سيز بير شئي‌مي؟ جينايتکارام‌مي؟- بلي. بو آدي اؤزومه قازانديغيم او آن، جوشموشدو، دايانمادان حرکتده ايدي، فيرلانيردي فلگيمين چرخي. نه قدر هايقيرسامدا، هايقيريشيم سانکي ايچيمده بوغولموش، يا دا لال بير اينسانين چيغيرتيسي‌ايميش کيمي هئچ ائشيديلمه‌دي. هانسي کي، آوازيم ان سون تونونا قدر، چيغيريردي، آما بوشا، چونکو، هئچ نه دوردوران دئييل بو چرخي. بونا يئتن گوج يوخدور. بو گون زورلا منه صاحیب اولماق ايسته‌ين، ناموسومو کورلاماغا چاليشان و صاباح بونو باشقا، صاف، پاک قيزلارا قارشي تؤره‌دن اجلافا تشککورمو ائتمه‌لي‌ايديم؟ البته کي، يوخ! ناموسومو قورومالي‌ايديم و قورودوم. آما بونو بيلن وارمي؟ کيم بيله‌جک، کيم منه حاق وئره‌جک، کيم مني قوروياجاق؟ معده‌لريني گؤرمه‌ميش کيمي کاغيذ پارچالاري ايله دولدوروب، "اؤزلري‌نين ده قيزلاري وار"- آما بونو دوشونمه‌ين، منه پوزغون، لياقت‌سيز قادين دامغاسي ووران، داش اورکلي ظاليم‌لرمي؟ اورداکي يالانچي شاهيدلردن دئييل، منيم شاهيديم. بير تک آللاه بيلير اولان هر شئيي.

ديليميز دؤنوب- دولاشيب، هله زمانه کورلانيب دئييريک، داها دئميريک کي، اينسانلار کورلانيب و اؤز موردار اورکلري ايله کورلاييرلار اطرافي. نئجه ده وفاسيزدير بسله‌ديکلرين آي دونيا، نئجه ده پوزوبلار سني! نئجه ده کورلاييبلار بو اينسانلار بو فقير زمانه‌ني. حاکيمين منه حؤکم اوخودوغو همن او آن، اوره‌ييم دليجه چيرپينيردي. گؤزلريم هئچ نه گؤرمور، قولاقلاريم هئچ نه ائشيتميردي. بيرجه اونو بيليرديم کي، ناموسوم‌لا، آريم‌لا، اَييلمز قامتيم‌له، گوجلو قادينليغيم‌لا من فخر ائديرم. بلي، دوز 10 ايل، 10 بؤيوک ايل آلديلار عؤمرومدن. و من او آن آنلاديم کي، بو حياتدا نه قدر آغادير، نه قدر دوغرودور يالان.