اللري کؤپک قاتيلي
اللري کؤپک قاتيلي
تميراغا دمير
استانبولجادان كؤچوروب سادهلشديرن: عيوض بيات
بو سئودانين باشلانقيج تاريخيني خاطيرلاماياجاق قدر اونوتقان[1] دئييلدي اصلينده. سادهجه اونوتماق ايچين بئينيني ريسئت[2]لهمهيه چاليشيردي. نئجه باشلاديغيني، نئجه دوام ائتديگيني و نئجه سونوجلانديغيني خاطيرلاماق ايستهميردي...
بوسبوتون باشقا بيري اولموشدو. آرتيق يوللارا دا باخميردي. قلبيندهکي بو درده کيمسه درمان اولمازدي. گئجهلري سؤيهرک[3] ياتيب، صاباحلاري، دوغان گونهشه يامان دئيهرک اويانيردي.
بو ياشانانلار دريندن تيترَتميشدي اورَييني...
فاحشه اوشاقلاريني اؤلدورهجکدي ياخين بير تاريخده. پوليسه اؤزونو تسليم ائدهجك قدر دلي قانلي، اينسانلارا قييماياجاق قدر حساسدي. بو سويوت (مجرد) انفاذ (اعدام) نهدن گرچکلشهجکدي ياخشي؟ بو يالانجي باهار چيچکلرينين سوچوندان آرتيق باخديغي گؤزلر سوچلويدو. آدام اولماياجاغي بللي اولان بير حيواني ائوجيللشديرمهيه (اهلي كردن) چاليشماق كيمي بيهوده بير گيريشيمده بولونموشدو. آما هر دؤنه، هر ائوجيللشديرمک ايستهديگينده بير يئريني قاپيردي. يارالانيردي...
آراليق کؤپکلري ايله بيرليکده گزمهيي بير شئي ساناراق دولاشيردي. نه زامان صاحیبي بويوندوروغونو سؤکسه، او همن کؤپکلرين ايچينه قاريشاردي. اصيل بير شکيلده پيشيك پارچالاماق وارکن، گئديب ميخانا و بار اؤنلرينده اؤزونه آتيلاجاق سوموگو گؤزلردي، آيري آراليق کؤپکلري كيمي...
و پاويونون[4] گؤزتچي ايتي باجاريردي هاميسيني...
پاويونون صاحیبي اولاجاق حدده بوندان کئيف آلاراق، اؤز حيواني جينسيليگيني تأمين ائدردي، ائوده باشقالاري طرفيندن بئجَريلن آرواديندان خبرسيزجه...
آراليق کؤپَگينين ائوجيللشمهيهجهگيني اؤيرَنهنه قدر چوخ يارا آلدي. عصيان ائتدي. کؤپَگي جزا وئردي. آجيلار آتدي يئمهگينه... آما کؤپک کؤپکليگيندن واز گئچمهدي. صاحیبينين شرفليجه وئرديگي چؤرَگي دئييل ده گؤزتچي کؤپهگي طرفيندن بئجَريلديکدن سونرا يالاديغي سوموگو ترجيه ائتدي.
کؤپک... رذيل کؤپک...
نه ايسه کي صاحیبي اولاجاق فرق ائتدي بو ائوجيللشمهمه حالينا، آما بو آرادا بوتون محللهني ده رذيل ائتدي. اؤزو ده رسوا اولدو...
ايندي صاحیبي تک وارليغي اولان کؤپَگيني بوراخدي. نه حالين وارسا گؤر درجهسينه... اودا شرفسيزجه ياشايان فاحيشه دؤل[5]لرينين يانينا گئتدي. کؤپک کؤپکليگيني ائتدي... صادق اولمادي. بير پيشيك روحو داشييارميش كيمي نانکور و عاجيز داوراندي...
گئتمهدن اؤنجه، دفعهلرجه قاپدي صاحیبيني...
يازيق، يالنيز قالدي، زاواللي آدام تک وارليغي اولان ايتيني ده آرالقلارا سالماق زوروندا قالدي... غرورسوز ياشانماز دئدي. آدام ووردو، قورد قووالادي...
توم کؤپکلري زهرلهدي... هاوالاندي... توتوقلاندي...
يئتکيليلر (صلاحيتليلر) گلديلر چئورهدهکي حيوانلارا ضرر وئرديگي ايچين توتوقلاديلار، قاراقولا گؤتوردولر، جوپلاديلار، ووردولار...
اومورسامادي (اهميت وئرمهدي)، «توم کؤپکلر اؤلهجک» دئييردي شعورسوزجا... حاکيمه، ساوجييا[6]، وكيله، موباشيره، سوتونه- سوموگونه سؤيدو...
حاکيم سون سؤزونو سوردو: «بوتون کؤپکلر اؤلهجک» دئدي.
حبس ابد وئرديلر. آلمادي... قاچاجايام دئدي.
هجرهيه آتديلار، آنادان اولان كيمي، عريان سويدولار؛ آنالارينا يامان دئدي. دايانمادان سو ايچيردي، داملايان بولاغا آغزيني داياياراق، ايشهمهيي ايله بو بارماقليقلاري كسسَيدي، قاچمايي تمام ايدي...
آيلارجا سو ايچدي و سيديگين اسيدي ايله دميرلري دَلمهيه چاليشدي. و بير گون... باجاردي... دَلدي...
بير چيرپيدا آتلادي دوواردان آنادان اولان كيمي، عريان؛ آنالارينا يامان دئيهرک قاچدي... اؤنونه گلن ان عصبي، ان پارچالاييجي کؤپکلري، اللري ايله بوغوب، سونرا هاميسيني ساغا دوغرو ياتيريردي...
نه قدر کؤپک قارشي گلدي ايسه، هاميسيني اللري ايله بوغاراق اؤلدوردو. ديشلريني و توپورجكلريني گؤردوکجه داها دا قووتله سيخيردي بوغازلاريني...
...
سونرا يولدا ياخالاديلار. گؤتوروب آپارديلار، محکمهيه چيخارديلار...
حاکيم، «نهدن؟» دئدي...
جواب وئرمهدي.
راپورونا «دلي» يازديلار. «باقرکؤي»ه آتديلار. گئدين باخين هله اوردا ياتار...
[1]- فراموشكار.
[2]- reset: يئني دن نصب ائتمك، يعني دن باشلاماغا چالشماق.
[3]- söymək: يامان دئمك.
[4]- pavyon: غرفه، كلوپ.
[5]- döl: نطفه، مني، سلاله.
[6]- savcı: دادستان، مدع العموم.
عيوض بيات، 1360(ائيواز بايات)، زنگان.