كؤچوردویوم 5
آياققابي
يازار:AHMET ÜNAL ÇAM
كؤچورن: عيوض بيات
سانکي گلهجک آي گؤيدن پارا ياغاجاق. هم ائو صاحیبيم ده زنگين بيري ساييلماز کي. کيمسهدن بورج ايستَمهيه ده اوزوم قالمادي. 20 ميليون دا کيرايه وئرينجه الده 10 قالاجاق، باققال آرتيق گؤزلهمز، 5 ده اونا. قالان 5 ده بير هفته يئتر. سونرا دا ...". «آدام» ائوينه دؤندو. ايچهري گيردي، سيخينتيلاريني اولابيلدييجه عائيلهسينه يانسيتمايان بيري ايدي. اوزوندهکي سيخينتيلي ايفادهيي زورلا دا اولسا دئييشديردي، گولر اوزله ايچهري سسلندي؛
- سلام . . . کيمسه يوخ مو؟ بو يورغون و ياشلي آدامي قارشيلاياجاق کيمسه يوخ مو؟
خانيمي قاچاراق گلدي، ژاکئتيني آلدي؛
- قوسورا باخما بئي، گلديگيني دويماديم.
- اه، اليميز بوش اولونجا اوزوموزه باخيلمير، نه ائيلهييم.
- اؤيله دئمه بئي.
- شوخلوق ائلهديم جانيم، شوخلوق ائله ديم، ناراحات اولما. . . اليم دولو اولسا دا اوزومه باخيلمير، دييه جکديم!
اونون شوخلوقلارينا آليشميش اولان خانيمي بو دفعه سس چيخارمادي، ساده جه گولومسهدي.
- يورغون گؤرونورسن.
- بيراز يورغونام خانيم.
-آجيخيبسان، ايندي يئمهييني گتيرهرم.
- خانيم آجيخديم آجيخماسينا دا، زحمت اولمازسا باشقا بير شئي ايستييهجم.
- اثتغفرالله بئي، بويور !... .
- سن دييَن كيمي يورغون دئييليم، آما آياقلاريم چوخ آغريميش، بير لَيَنه (leyene) آز بير سو قويسان، سنه زحمت دير.
- البتده ايندي گتيريرم.
آدام ائشوفمانيني (eşofmanını) گئييب اوتورموشدو کي، خانيمي بير لَيَن سو ايله گيردي. آدام يورغون آياقلاريني سويا دالديرمادان ناراحاتجاسينا سوروشدو؛
- منيم تاتلي قيزيم هاردا، ساخلاندي مي ياراماز؟
آنا باشيني اؤنونه ائيدي،
- نه اولدو، بير شئي مي وار؟ …سؤيله جانيم.
- ايچهريده ... آغلييير.
- آغلييير مي!. . . نييه؟
- آياققابي ايستييير.
- داها اؤنجه دانيشميشديق، آلاماياجاغيمي سؤيلهميشديم. هم ده آياققابيسي كؤهنه دئييل کي؟
- كؤهنهليگي ايچين دئييل، يولداشلاريندا گؤردويو، يئني چيخان بير آياققابيدان ايستييير.
- خانيم بيليرسن پارا دورومونو…
- من بيليرم ده، او …
- بير يول دا دانيشارام، منيم قيزيم آنلاييشليدير. چاغير گلسين.
قادين قيزيني چاغيردي، قالخماق ايستهمهين قيزيني، زور دا اولسا چئكه- چئكه باباسينين يانينا گتيردي و اونون يانيندا اوتورتدو. اولابيلديگينجه قيرمامايا چاليشاراق دانيشدي؛
- قيزيم، سنينله داها گئچن آخشام دانيشميشديم. آياققابي آلاجاق قدر پولوموز يوخ، هم آياغينداکيلار دا كؤهنه دئييل.
- باشقالاري نئجه آليرلار؟ قيزي دئدي.
- ياوروم اونلارين دورومو داها ايييسه آلابيليرلر. بيزيم دوروموموز ياخشي دئييل. بکله نئچه آي سونرا آلابيلهريك.
- منهنه، يولداشلاريم آلدي، من ده آلاجام، دييه يئنه آغلامايا باشلاميشدي.
- نه قدرميش؟ او آياققابي قيمهتيني بيليرميسن؟
- 4 ميليون.
- قيزيم سنه او آياققابيني آليرساق اليميزده پول قالمير. گتير باخيم سنين ايندي گئيديگين آياققابيلارينا.
قيز حيرسله گتيردي، يئره آتدي. آدام اوشاغين سايغيسيزليغيني گؤرمهمزليکدن گلدي. خيردا اوشاقلار ايچين بؤيله هوسلرين نه درجه اؤنملي اولدوغونو بيليردي. هله يولداشلاريندان بيري اونو قيسقانديردييسا، او كيچيک دونياسيندا توم خييالي او آياققابي اولموشدور، باشقا بيرشئي دوشونمز بيله، دييه عاقليندان گئچيردي. فقط آدامين دا گؤرهجك بيرشئيي يوخدو. چوخ اوزون بير سسسيزليک اولدو، آدام قيزيني قيرمادان ناسيل چؤزوم بولاجاغيني دوشونوردو. خانيمي ايسه اَرينين، آياققابيلارين يئره آتيليشينا سينيرلانديغيني دوشونوب انديشهايله بکليييردي. آدام اومودسوزجا قيزيندان بير داها سوروشدو؛
- قيزيم، بو آياققابيلار هيچ ده كؤهنه گؤرونمور، بير نئچه آي داها گئي دا.
- كؤهنهدي، ايندي كؤهنهدي، گئيمَم. بونلار كؤهنهدي!
آدامين ايچي ايچيني يئييردي. بير مدّت بير شئي آختارار كيمي خانيمينا باخدي. ايللردير سيخينتي ايچينده ياشايان آما ائوه هر گليشينده گولر اوزونو اکسيلتمهين وفاکار خانيمي، ياپاجاق بيرشئيي اولماديغيني گؤسترمک ايچين، اللريني ايکي يانا آچدي. آدام بيردن آياغا قالخدي، گئيينمهيه باشلادي.
- قيزيم ايندي كي منيم، «آياققابين كؤهنه دئييل» سؤزومه باخميرسان، گئي آياققابيلاريني ائشيكده قاباغيميزا گلن بير اوشاغدان سوروشاجاييق، سن سوروشاجاقسان. اگر سوروشدوغون اوشاق، بو آياققابيلار ايچين، كؤهنه دئسه و يا بئيَنمَزسه سؤز ايستهدييين او آياققابيلاري آلاجاغيم.
آياققابي آلينماسيندان تامامن اوميدسيز اولان قيز بونو دويونجا هيجانلاندي. تئز حاضيرلاندي. بابا قيز ال- اله كوچهيه چيخديلار. هئچ دانيشمادان بير نئچه كوچه گئچميشديلر کي، باباسي بير کؤشهيي گؤستئردي؛
- باخ بو کؤشهده اوتوران بير اوشاق وار، ائله سنين ياشلاريندا. سوروش گؤروم آياققابيلارين گوزل مي دئييل مي!
قيز هوسله اوشاغين يانينا قاچدي آما بيرآن داياندي. اوشاغين شاشكين[1] باخيشلاري آراسيندا بير نئچه ثانييه اوردا قالديقدان سونرا آغلاياراق باباسينا دوغرو قاچدي. سوروشا بيلمهميشدي.
باباسي آغلايان قيزيني بوشلاييب، کؤشهدهکي اوشاغين يانينا گئتدي. جبيندهکي بوروشموش پوللاري، اوشاغين اؤنوندهکي مَنديله قويوب دؤندو. اوشاق هله، آغلاياراق اوزاقلاشان قيزا باخيردي، دووارا ياسلاديغي قولتوق دئيهنَکلهري نين آراسيندان.
[1]- تعجّبلو
عيوض بيات، 1360(ائيواز بايات)، زنگان.