تبت يدا رومانينا بير باخيش (ايكينجي بؤلوم)

علي اصغر اجاقلو (سرين)

اونجه اوخودوغوم اثرين آچيقلانماسي و يا تفسير- تاويله احتياجي اولماديغي ايچين ساده‌جه كاراكترلر و اونلارين باشينا گلن اولاي‌لاري آراشديرماق باخيميندان بير پارا سؤز آچيقلاماغيمي آرتيق حيس ائده بيليرم.

«تبّت يدا» روماني كيمي توركجه تراژيك اثرلر، تحصيل آلديقيميز فارس ادبياتيندا بو گونه دك يازيلان داستان‌لاردا محتوم اولاي‌‌لار سونونجو، تيكرار خاطيرلاتمادادير. ياني بو كيمي داستانلارين توركجه يازيب، ياييلديغي و بوتون اوخوجولار طرفيندن آلقيشلانماغي- تكجه توركجه يازيلي كيتابلاري، اؤزلليكده توركجه حيكايه و رومان لار ايزيني ايزله‌ين اوخوجولار طرفيندن اوخونماسي-  هئچ ده شاشيرديجي بير قونو اولا بيلمز. آنجاق بو گرگين سورج ايچره يازارلاريميز يئني روايت تكنيك‌لريني، اينانديريجي حاديثه ياراتماق و گونده‌كي گؤردوگوموز آدام‌لار كيمي داستان كاراكترلري بس- بللي بسله‌مك گوجونو الده ائتمك زوروندا اولدغونو آپ- آچيق دويا بيليرلر.

دونيادا يئني ادبيات جريانلاريني ايزله‌ين اديبلر يا ساده‌جه اوخوجولار، اينانيرام كي باشدا دئديگيم سؤزلرين ان آزيني دوغرودان تاييد ائده بيله‌جك مقاميندا اولا بيلرلر. دئمه‌لييم آرد- آردا آدليم يازارلار آدينا ياييملانان آوانقارد يازيلي ادبيات، حتي فارسجا ديلينه چئوريلن رومانلارين اوخوماسي زامان- زامان گنج يازارلاريميز اؤزلليكده رومانچي‌لاريميزي آرتيق فايدالانديرا بيلير. منجه تبّت يدا روماني ايچره بيري- بيرينه سارماشيق كيمي گيريشيب توخونان اولاي‌لار و كاراكترلري باشاريلا بسله‌ييب، آنلادا بيلمك ايچين چئشيدلي اينانديریجی تكنيك‌لري گؤزه گلمه‌ديگينه گؤره سايين باريشماز گؤزله‌ديگي نائليتلريندن اوزاق دوشموش حسابيندادير. بو تور رئال اثرلري ياراتماق ايچين هئچ ده لازيم دئييل يوروجو جزءلاري، آرتيق توصيفلري، اوزون- اوزون قونوشمالاري اولدوغو يا باش وئرديگي كيمي سطير- سطير، صفحه- صفحه كيتابي قالينديرماق آماجی ایچین قوللانیلسین.