من دونيادا هامي‌نين سئومه‌سيني ايسته‌ييرم

«تئومان[1]»لا صمیمی بیر دانیشیق

كؤچوروب حاضيرلايان: عيوض بيات

«تئومان» سون آلبومو اولان "اينسانليک حاللئري"ني سانکي سون آلبومو کيمي چيخارديغيني دئيير. بونو دئمه‌سينه سبب البته کي، آرتيق موسيقي‌دن چوخ، حياتلا ماراقلانماق ايسته‌يي‌نين اولماسي‌دير. پرستيشکارلاريني (طرفدار، هواخواه) حئيرتلنديره‌جک چوخ صميمي اعتراف‌لار ائدير. ائولنمک ايسته‌ييني، اؤزونه دينجلمه وئره‌جک بير اوشاق آرزوسو اولدوغوندان دانيشير. حتّی "کاش کي، قارداشيم، هر شئيدن ال چکيرم دئسم... ساتيب- سوورسام هر شئييمي" دئيه‌جک درجه‌ده بئزيب بو حياتدان. عيني زاماندا حياتدا ان چوخ داريخديغي شئيلر، اونو ان چوخ قورخودان شئيلردير. تئومانين وضعيتي بو صميمي صؤحبتده...

 

س- سون آلبومونوز اولان "اينسانليک حاللئري"نين موضوع‌سو عمومي بير وضعيت‌دير، يوخسا تئومانين وضعيتيني گؤسترير؟

ج- اونسوزدا من عادتا بيرينجي شخص‌دن يازيرام و اؤزومدن بحث ائديرم، آما اوچونجو شخص‌دن يازديغيم، حيکايه فورماسيندا يازديغيم شئيلر ده وار. "اينسانليک حاللئري" يالنيز من‌دن دئييل، فرقلي اينسانلاردان دا دانيشير، آما بير موسيقيچي يازارکن باشقاسيندان بحث ائتسه ده، عئيني زاماندا اؤزوندن ده بحث ائدير.

س- بو آلبومونوزون آيري آلبوملارينيزدان فرقي نه اولدو؟

ج- اوچ ايل ايدي کي، هئچ بير ايش گؤرموردوم و دوزو بو ايچيمدن ده گلميردي. ايچيمدن گلمه‌دييي حالدا، اؤزومو مجبور ائده‌رک دئييرديم کي، آرتيق يازماغا باشلاماق لازيم‌دير. ايچيمدن گلمه‌سه يازا بيلميرم. هئچ جوره ماهني بسله‌يه بيلميرديم. "يقين بوندان سونرا يازمارام" دئييرديم. يايدا نئجه اولدوسا، بيردن- بيره يازماغا باشلاديم. هدف سئچمه‌دن باشلايينجا، اؤز-اؤزونه آليندي. داها اؤنجه‌دن اؤزومو مجبور ائديرديم. بيردن- بيره هوس‌لنديم. ايسته‌ديم کي، سککيزينجي آلبومو داها فرقلي بير شکيلده حاضيرلاييم. يئددي آلبومدا اؤيرنديگيم شئيلري بيلسم ده، اليم ايلک دفعه اونلارا اوزانسا دا، اونلاردان ايستيفاده ائتمه‌مک اوچون چاليشديغيم بير شئي اولدو. ماهني نين فورماسي ايله ده آزاجيق اويناماق ايسته‌ديم، بعضي‌لرينده نقارتدن ايستيفاده ائتمه‌ديم، اوزون-اوزادي سؤزلر يازديم، حیکايه‌لر دانيشديم. "يالنيز کالپ‌لر سوتونو" دا اولدوغو کيمي مئلوديک کئچيدلرين اولماديغي شئيلر. واختلاريني دييشديم. 4-4 لوک گئدرکن، ماهني 6-8- ليک فورمايا دوشدو. داها دوغروسو بير آز دا سيناديم. اصلينده منيم گئنيش بير ذوق آنلاييشيم يوخدو، يئنه ده بو ذوق داخيلينده کيچيک دَييشيکليک‌لر ائتديم. ديگر آلبوملاردا ائتمه‌ديکلريمي بو آلبومدا ائتديم.

س- بو بير آختاريشدي؟

ج- اوّل ائتديگيم کيمي دوزلتسَيديم داها راحات اولا بيلردي، بو وضعيت‌ده ايسه ايسته‌ديگيم بعضي شئيلري قاباغا آتميش اولاجاقديم. ايسته‌ديم کي، بو آلبومو، ائله بيل سونونجويموش کيمي، ايچيمده هئچ نه قالماسين دئيه ائديم.

س- ياخشي، بو سون آلبومدور؟

ج- (گولور) اولا بيلر. منيم ايسته‌یيم آسيلي اولمادان دا اولا بيلر. بو محدوده‌ده‌کي وضعيتدن آسيلي‌دير. بلکه ده بوندان سونرا آلبوملارين چيخماياجاغيني گؤزله‌ييرم. آلبوم ساتيشلاري دفعه‌لرله آزاليب. ساتيش شيرکتلري اولماسا، بيز بو آلبوملاري اينترنت‌دن يا دا باشقا فورمادا 500-1000 نفره چاتديرا بيلريک آما من اينسانلارين آلبوم کيمي آلماسيني ايسته‌ييرم.

س- لازيم گلسه 15 گونده بير آلبوم چيخاردارام دئييردينيز؟ نه اولدو بس؟ تئومان انرژي‌سيني و سؤزلريني ايتيرديمي؟ (گولوشمه‌لر)

ج- من اؤز استانداردلاريما اويغون اولمايان آلبوم چيخاردا بيله‌رم. باشقالاريندان دا ياخشيسيني ائده‌رم. صؤحبت قابليت‌دن گئتمير. ايشلر نئجه گئدير، نئجه آپاريلير اونو بيليرم. آما ايچينده ماهني‌نين امين‌ليگي يوخدورسا، من اونا ال آتميرام. بعضاً اليمه گيتار گؤتورمه‌دن، گونلرله ماهني نئجه اولسون، سؤزلري نئجه اولسون دئيه فيکيرلشيرم. بئله اولاندا دا آسانلاشير. چونکي بئينيمده کي فورمالاري، اوّل‌کي حاضيرليقلار گؤرورم. بوندان سونرا اليمه گيتار آلديغيم زامان تاماملايا بيليرم. بيرده کي، مني موسيقيدن چوخ ماهني‌نين قورولوشو ماراقلانديرير. بو فورما داخيلينده ده سؤزلرله داها چوخ ماراقلانيرام. بئله اولاندا آیری ايفاده فورمالارينا دقت ائديرم. حیکايه ده اولسايدي نئجه ايفاده اولوناردي، کينوماتوقرافيک بير شئي ايفاده ائتمک ايسته‌سم قارشي طرفه بونو نئجه چاتديرارديم کيمي فيکيرلردن ده ايستيفاده ائديرم. هر بيري‌نين اؤز حیکايه‌سينده باشقا ماهنيلارا اوخشامايان بير شئي اولماسينا جهد گؤستريرم.

س- سؤزلر چوخالينجا تئومان رپ موسيقيسينه دوغرومو يؤنه‌لير. (گولوشمه‌لر)

ج- رپ منه 20 ياشلي اينسانلارين موسيقيسي کيمي گؤرونور. من او ايستيقامته گئده بيلمه‌رم، عيني زاماندا تئز- تئز دانيشا دا بيلمه‌رم (گولوشمه‌لر). تئز- تئز يازارام آما. حتّی جوخ تئز- تئز دانيشان اينسانلارين يانيندا تلفظ‌وم داها دا ضعيف‌له‌يير، تردّد کئچيريرم. آما رپي بيه‌نيرم. ائشيتديگيم زامان خوشوما گلن بير موسيقيدير. امينم کي، 13-15 ياشيمدا اولسايديم، رپ سئون بيريسي اولارديم.

س- رپ دئيردينيز مي؟

ج- رپ دئيرديممي؟ دوشونمورم. مني داها موسقيلي شئيلر ماراقلانديرير. رپ موسيقي ژانرينا دقّت ائتمه‌ين، داها چوخ ايفاده‌سي اولان و فيکري بو ايفاده‌ني داها دا اينکيشاف ائتديرن ژانردير. بير فورمادا خوشوما گلير.

س- ماهنينيزدا "هرکس مراک ايچينده، اؤلومدن سونرا حايات وار مي دييه، سانکي اؤلوم وار مي حاياتتان اؤنجه" دئييرسينيز. هم اوّلکي، هم ده سونراکي حياتين موجودلوغوندان امتناع ائتمک...

ج- (گولور) اوّلکي... يني، اصلينده تاماميله منيم فيکريم دئييل. بسطه‌کارين هميشه بير فيکري وار، اورداکي کاراکتئر حياتدان او قدر بئزيب کي، "اصلينده ياشاييرام آما حيات يوخدو کيمي بير فيکير. ديگر اينسانلارلا آراسينداکي فرقي دوشونور. هرکس ياشاديغي‌نين بير حيات اولدوغونو دوشونور. و سونرا باشقا بير حياتي تصوّر ائدير، آما هئچ بوردا دا ياشاميرلار. نفس آلماق حياتدا قالماق دئمکدير، آما او دا حياتا ضمانت وئرمير. من ده داها ياخشي بير حياتين خياليني قوروردوم ... (فيکيرلَشير) او كاراکتئري ده ائله ياراتديم من.

س- داها ياخشي حيات قورماغينيزا نه مانع اولدو کي؟

ج- من دونيانين حاليني (اودقونور)، احواليني سئوميرم. داها ياخشي بير يئرين اولدوغونا اوميد ائديرديم. منيم اوشاقليغيمداکي دَيَر سيستئمي، دَيَرلر آرتيق چوخ دا قيمت‌لنديريليلن دَيَرلر دئييل. اونلار داها گؤزل ايدي. نه‌دنسه دانيشيلاندا داها معنوي شئيلردن بحث ائديليردي. ايندي آرتيق سايلار، دَيَرلر يئرينه قيمتلردن (فيياتلار) دانيشيرلار. هر شئيي پولا دييشيرلر. دونيانين داها دويغوسال بير يئر اولاجاغيني دوشونوردوم؛ داها قايغي‌کش و ويجدانلي. دونيا چوخ قورخولودور، چوخ... اينسانلار قزئتلرده کي خبرلري اوخويور، آنجاق اونلاري ساده‌جه اينفورماسييا اولاراق قارشيلاييرلار. يعني هر هانسي بير قزئتين اوچونجو صحيفه‌سيني اوخودوغوم زامان، دونيايا قارشي بؤيوک بير اورَک بولانمام يارانير. گنج بير قيزين باشيني کسيرلر، کانتينئره آتيرلار. بئش مين نفري اؤلدورورلر. جنوب-شرقين هر يئرينده موحاريبه وار. هامي بير-بيرينه نيفرت ائدير. او قدر کدرلي‌دير کي.

س- بونا گؤره‌مي ماهنيلارينيزين سؤزلرينده اوشاقليغينيزا داير بير حسرت وار؟

ج- نييه‌سه من اوّل‌لر دونيانين داها ياخشي بير يئر اولدوغونو خاطيرلاييرام. ان آزيندان منه داها اويغون بير يئر ايدي. او حقيقت اولمايا بيلر. او گونلري فيکيرلشنده 80-جي ايللرده گونده 30 نفر اؤلوردو- آما من يئنه ده اطرافيمدا سئوگي گؤردويومو خاطيرلاييرام. يالنيز منه دئييل، اينسانلار بير-بيرلرينه قارشي دا بئله ايديلر. اوللر باشقاسي نين چتينليگي ايله کدرلنمک، سئوينجي ايله سئوينمک ده وار ايدي. ايندي چوخ تئز کئچير هر شئي.

س- اوندا سيز گله‌جه‌يين يوخ، کئچميشين آداميسيز؟

ج- من نوستالژي کاراکتئره صاحیب آدامام. کئچميشده ياشاماق ايسته‌مزديم، آما اوردا اولان بعضي خوشلانديغيم شئيلر ايندي اولسا اؤزومو داها ياخشي حيس ائدرديم. هر شئي چوخ سورعتلندي. اونلاري تام حيس ائتميرم، آما عجايب شئيلر باش وئرير. هر شئي چوخ آز اولمالي ايدي، آما هر شئي چوخدو. داها آز اولمالي ايديلار. تماميله ايضاح ائده بيلميرم آما منيم ده بئله معلومات بوللوغوندا ديقتيم داغيلير. هر کس چوخ يالانچيدير. او گون دوستلارلا "هانسي سينما داها ياخشي، هانسي داها پيسدير" دئيه مباحثه ائتديگيميز زامان، گؤردوک کي،- بلکه من ده اونلارا داخيلم- اينسانلار هئچ باخماديغي فيلملري، اوخوماديغي کيتابلاري مذاکيره ائديرلر." من او فيلمي ايزله‌مه‌يه گئتمه‌يه‌جم، چونکي "... دئييب خيردا معلومات آزليغييلا يولا وئريرلر. اوسته‌ليک ده خيردا بيلگيلري فلسفه حساب ائتمک ده چوخ قورخولودور. (گولوشمه‌لر)

س- ياخشي، اوندا هر شئي اوزرينيزه گلديگي زامان سيزي نه راحاتلاداجاق؟

ج- آختاريرام. يعني خوشبخت اولدوغوم آنلار سئوديکلريمله بيرليکده اولدوغوم واختالاردير. نه راحاتلاداجاق؟ بير نئچه سئچيميم وار. بلکه اوشاق،- کي بونا داها چوخ اينانيرام- چوخ اوشاق، چوخ گؤزل شئيلر وئرديگي حالدا، عيني زاماندا اينسانا بؤيوک مسئوليت‌لر و پسيخولوژي (روان‌شناسی) باسقي دا وئرير. ائوجانلي (صرفه‌جو، ممسك) بيريسي اولدوغوم اوچون، سئوديکلريمي چوخ قورويورام. محو اولارام يعني! اوسته‌ليک گئجه يوخودا اونلارا نه‌سه اولسا... ايستانبولدان اوزاقلاشماق چوخ گؤزل بير فيکير اولا بيلر. اؤزونو دونيادان تجريد ائتمک، کيچيک بير دونيا قورماق، چوخ شئيله ماراقلانماماق، کيتاب اوخوماق، پامودور اکمک و باشقا شئیلر. (گولور)

س- بونلار يالنيز خيالدير؟

ج- اوللر بلکه ده خيال ايدي، آما چوخ اوزاقلاردا اولان خيال دئييل. ايندي اله توتاجاغيم خيالا چئوريلميش شکيلده دير. شهر اوچون هئچ داريخمادان، اوزون زامان طبيعت قوينوندا واخت کئچيره بيليرم. ان آزيندان اينسانين، يانيندا هم چوخ سئوديگي، هم عاشيق اولدوغو، هم اينانديغي بير قادينين اولماسينا احتيياجي وار.

س-"چوبان ييلديزي" ماهنينيزدا، "شيمدي اؤلمک ايسته‌مم- بير کالبي سارمادان- آشکي تاتمادان داها" دئييرسينيز. بئله اينانديغينيز بير سئوگيني دادميسينيزمي؟

ج- سئوگي نين داديني گؤردوم. عاشيق اولدوم عزيزيم.

س- بو عشق سيزي نييه ائولي‌لييه آپارمادي. يوخسا مسئوليت قورخوسومو يئنه؟

ج- البته، طبيعي کي.. او قدر ناراحات ائدن بير حيس‌دير کي. اينسانين اؤزونون چوخ قورخاق اولدوغونو بيلمه‌سي ده پيسدير البته. هانسي‌سا بير شئيه باغلانديغيمدا نه ائده‌جه‌گيمي بيلميرم. هر طرفدن محاصره اولونموش کيمي حيسّ ائديرم اؤزومو. بئله بير شئي وار. بيرينجيسي، اطرافيمداکي هر کس منه ايللرله اوشاق کيمي داوراندي. هله ده بو ياشدا ائله داورانيرلار. بو اوشاق رولومدان داها يوکسکده کي آتايا دا اَر وظيفه‌سينه کئچمک منه چوخ چتين گلير. يا دا دوشوندويوم کيمي بير شئي دئييل، اؤز حرکتلري ايله باشقا بير مناسبت فورماسي قورمالييام.

س- اونداسا بونو ائدين ده. سيناماغا دَيمز؟

ج- دَيَر. اونسوز دا هئچ واخت اوستونه خط چکديگيم بير سئچيم دئييل بو. واختي ايله دوشوندويوم و چوخ ياخينلاشديغيم بير شئي ده اولدو، آما پسيخولوژي اولاراق چوخ دا ياخشي دئييلديم او زامانلار. ضعيف اولدوغوم بير واخت ايدي، آلينمادي.

س- سيز آتانيزي ايکي ياشينيزدا ايتيرميسينيز. منجه، آتانيزدان آلا بيلمه‌ديگينيز سئوگيني اؤز اوشاغينيزا دا وئره بيلمه‌مکدن قورخورسونوز.

ج- اوشاغيم اولسا، منيم ده حياتيم چوخ دَيَرلي اولاجاق. صرف اونو فيکيرلشديگيم اوچون. ايندي اؤز حياتيم منيم وئجيمه دئييل. سئوديکلريم منيم اوچون داها اساسدير، خوشبختليگيمي ده، بدبختليگيمي ده اونلارا باغلاييرام. البته کي، ترس بير ياني دا وار. اينسان بير اوشاغي اولاندا نه ائده‌جه‌یيني فيکيرلشه بيلير، آياقلاريني دونيايا داها ياخشي باسا بيلير. بونلاري بيليرم. داواملي ضدّيت. ان قورخدوغوم شئيلر، داريخديغيم شئيلردير...

س- حياتينيز ضدّيتلرله دولودور آما. ریاضیات اوخويوب، ماهني سؤزو يازماق کيمي، سئويلمکدن يورولوب، يئنه اونا دوغرو گئتمک کيمي.

ج- ضديتلريم چوخدور. ریاضیاتدان سونرا، سوسيولوگييا (جامعه شناسی) اوخودوم. ذوق آلماق اوچون هر يئره باش ووردوم.

س- آتانيزين اؤلومودن سونرا سيزه عاييله‌نيز طرفيندن گؤستريلن دقّت و سئوگيدن يورولموسونوز، آما آلبوم چيخارداراق، دويغولارا سسله‌نن ماهني سؤزلري يازاراق اؤزونوزه يئني پرستيشکار اوردوسو ياراديرسيزنيز. بو سئوگي آرزوسونا نه آد وئرک بس؟

ج- بوردا ايسته‌ميرم، ساغ جيبيمه قوي وضعيتي يارانير. من بو ايشي نييه گؤرورم. اينسانلارا نه‌سه دئمک ايسته‌ييرم. نييه؟ اوميدسيزجه، اينسانلارلا علاقه ياراتماغا چاليشيرام. بونو شخصي حياتيمدا تمامن ائده بيلمه‌ديگيم اوچون ده ماهنيلار منيم کؤمَگيمه گلير. بونلار بير چوخ چتينليکلره قارشي دؤزمک اوچون منه گوج وئرن شئيلردير. چوخ دا دَيَرسيز اولدوغونو فيکيرلشمک ايسته‌ميرم. اصلينده بسطه‌کارليغي و ايفاچيليغي دا موهوم بير شئي حساب ائتميرم. ايسته‌ييرم کي، مني دونيادا هامي سئوسين. (گولوشمه‌لر). آما او سئوگييه چاتماق اوچون نه‌سه ائتمک پيسيمه گلير. نئجه وارامسا ائله اولوم من. اونسوز دا قايغي‌کش بير آدامام. بير چوخ ياخشي خاصيتيم وار. سئوگييه آج بيريسي دئييلم، آما سئويلمک ايسته‌ييرم.

س- کناردان باخاندا هئچ ده ياخشي خاصيتلري اولان آدام تاثيري باغيشلاميرسينيز.

ج- اونسوز دا من اؤزومو تانيييرام. هم اؤزومو مدافيعه ائتمه‌رم، هم ده حدسيز درجه ده چيلپاق گؤسترمه‌يه چالیشارام. بعضاً شوخلوقجولام. آداملار بونو حقيقت حساب ائده بيلر. البته کي، بو اؤز سهويمدير. مني ياخشي بير آدام اولاراق تقديم ائدرلر. دوز آدامام، كيشي‌يَم و برابرليک، حق- عدالت طرفداري‌يام.

س- قوجاليرسيز؟ (گولوشمه‌لر)

ج- يقين ائله بير شئيدير. حيات ائله بير يئره گئتسه، چوخ ياخشيدير. بوندان راضي‌يام مثلا. بير شکيلده اوميد وئرير منه. دئمه‌لي کي، کيچيک بير باغ بئجه‌ره‌رک، بئله بير شئيله خوشبخت اولا بيله‌جه‌یيمي حيس ائديرم. جنوبدا دوستلاريم وار. نجّارليقلا مشغول اولورلار، ماسا (میز) دوزلديرلر. ال توتولان بير شئي دوزلديرلر. ائتديکلري ايشدن هئچ اوزاقلاشميرلار و اونون اوسوتونده يئمک يئييرلر. او قدر گؤزلدير کي...

س- اوسته‌ليک پايلاشماغي سئوميرسينيز؟

ج- پولومو پايلاشارام، آما ائويمي هئچ واخت. ائويمه گليرلر، آما چوخ قالماسينلار. هئچ کيمين چاماداني ائويمده قالماسين. بئله شئيلري سئوميرم. سهو اولاراق قالا بيلر. آما من هر هانسي بير موقاويله‌يه ايمضا آتديغيم زامان، بو ايشدن تاماميله سويويورام. کيمسه دئسه کي، "سيزده 15 گون قالاجاغام"، قورخودان يا دا، ناراحاتچيليقدان اورَگيم گئدر. (گولور) آما بير نفر گَلر هئچ فيکيرلشمه‌ديگيم، اون بئش گون قالار، اوندا مسئله دئييل.

س- مقصدينيز باشقالارينا اوخشامايان، يالنيز اؤز دونياسي اولان بير قهرمانامي بنزه‌مکدير؟ يا دا اوشاقليغينيزدا اوخودوغونوز ناغيل قهرمانلارينامي اوخشاماق ايسته‌ييرسينيز؟

ج- البته کي، ايدئالي اولان اينسانلار، ايدئال اولماق ايسته‌ييرلر دئيه بير شئي وار. واختي ايله، منيم چوخلو ايدئاللاريم وارايدي. من او اينسانلارا نئجه حئيرانامسا، باشقالاري نين دا منه ائله پرستش ائتمه‌سيني ايسته‌ييرم. اوشاقليغيمداکي ناغيل قهرمانلاري قدر اوغورلو اولا بيلمه‌يه‌جه‌يیمه امينم. نه ائده‌جه‌يیمله باغلي اونلار قدر جسور، گوجلو و ايناملي دئييلم. بلکه آنتي‌قهرمان (گولور).

س- هانسي ناغيل قهرماني سيزه اويغوندور؟

ج- «مستر نو» يقين کي. اولماق ايسته‌ديگيم آدامدير. من ائله بيري دئييلم. او داها يونگول کاراکتئردير منجه، ائله اينسانلارا رغبت بسله‌ديم. دردلري اولماسينا باخماياراق حاليني پوزمايان، حياتلا مزه‌له‌نن آداملاردان اولماق ايسترديم. بعضاً باجاريرام بونو، آما هميشه آلينمير.

س- «تومميکسده» داواملي ايچن «کونياکچي»ني دا اؤزونوزه ياخين حساب ائديرسينيزمي؟

ج- (گولوشمه‌لر). «حکيم ساللوسون»و ياخين حيس ائديرم... بعضي تئلويزيون وئرليشلرينه باخاندا ائله گؤرونورم. ايچکيني سئويرم، آما کونياکچي قدر يوخ. او اينسانلار مني ائوده توتا بيلمه‌ديکلري اوچون باردا توتورلار. مونتاژ زاماني آرداردا دوزنده بارا گئدن بير آدام اولورسان. بوردا هئچ کيم سهو دئييل. البته کي، بير بالاجا سهو اولور. هردن ائله شئيلر اولور کي، "فیلانی بو سؤزلري دئدي، آز سونرا" دئييرلر. سونرا شايعه بوراخيرلار. آدام هئچ ائله بير شئي دئمه‌ييب. اونلارين سؤزويله ائله دئميش اولور. من ائله فورمت‌ده‌کي وئريليشلري،- اؤزومه عاييد اولانلار داخيل اولماقلا هئچ ايزله‌ميرم. منيم مئديادا ماراقلانديغيم شئيلر، او وضعيتيمله ماراقلانان حيصه‌لر دئييل. منيم دونيامدا او وئريليشلره يئر يوخدور. هر هانسي بير مشهورون و يا مغنّي نين بو قدر گوندمده اولماسيني معناسيزليق حساب ائديرم. او قدر ده لازيملي بير آدام دئييل اونسوز دا. اونسوز دا حيات تاماميله گيزلي اولماليدير. داها دوغروسو اينسانلار کيمينسه شخصي حياتيني اوتانج‌وئريجي بير شئي کيمي گؤرمه‌لي‌ديرلر. منيم ياخشي باجارديغيمي حساب ائتديگيم شئيلر ماهنيلاريم‌دير. بونون دا دونيادا ان لازيملي شئي اولماديغيني بيليرم. اونونلا ماراقلانسينلار. نه دونيادا ان ياخشي موسيقيچي‌يم، نه ده ياخشي ايچکي ايچَني. بلي نه ده ياخشي ايچکي ايچَنم...

س- ايچکيني ضعيف جهتلرينيزي گيزلتمک اوچون‌مو ايچيرسينيز؟

ج- من ايچکيدن گئجه حياتيندا استفاده ائديرم. محيطه اويغونلاشماغا کؤمک ائدير. اونسوز دا ائوده هئچ ايچکي ايچميرم. گوندوز واختي چوخ آز دانيشان آدامام اونسوز دا، بير آز دا يوروجو اولورام. بعضي آداملار "ائئ" دئييرلر منه. (گولور) عاغليما هئچ نه گلمير. آما گئجه حياتيندا بير آز دا ايچکي ايله دانيشيرام. گوندوزلر دانيشماغا ارينيرم، فيکيرلشيرم، کيتاب اوخويورام. ايچکي مني نشعه‌لي آدام ائدير. ايچنده کيمسه آغلايا بيلر، آما من خوشبخت اولورام. ياخشي دا ايچَنم آما.

س- عيني زاماندا ياخشي يومروق دا وورا بيليره دئييرسينيز...

ج- ائله ياخينلاشانا ايچکيسيز ده اولسام وورارام.

س- اوشاق اولاندا سيزه اؤيره‌ديلن تک اولما فيکري سيزي نئجه بيري ائتدي؟ گوجلو ائگو[2]سو اولان آدام‌سينيزمي؟

ج- ائگوم گوجلودور. آما بير چوخ ضعيف جهتيم اولدوغونو دا بيليرم. ماهنيلاريمي ان چوخ قارانليق طرفلريمدن يازيرام. ياخشي جهتلريمله ماهني يازا بيلمه‌رم. اونو ماهنييا داخيل ائتمک چتيندير. داها قارانليق و درين حيصه‌لردن نه‌سه چيخير. ياخشي جهتلريمدن ان چوخ اؤزومه تعريف، مدحييه آلينار. "من بئله‌يم، من ائله‌يم، بَتَرم" کيمي...

س- گوندوزلر گزينتييه چيخميرسيز؟

ج- تزه باشلاميشام. يازي سئويرم. آما کوچه‌لرده راحات گزه بيلمه‌ديگيم اوچون ناراحات اولورام. کافه‌يه گئديرم، اونون دا بير معناسي يوخدو... سوسياللاشماق.... حیکايه (گولوشمه‌لر). «بَي‌اوغلو» طرفلرده اؤزومو راحات حيس ائديرم. گوندوزلري خوشلاميرام اصلينده، فيکريمي قاريشديرير. چوخ سس وار، هامي نين ياشاديغيني، گزديگيني بيلمک بس ائدير. گئجه ايشيقلار سؤننده خوشوم گلير. "هامي ياتير، بورا منه قالدي" دئييرم. البته کي، بو پسيخولوژي بير تاثيردير. من اونسوزدا هميشه يئريمده اوتورورام. آما گئجه نين منيم اولدوغونو حيس ائديرم. اوشاق اولاندا اينسانلار سني گؤرمور- بونون‌چون داريخيرام. آما من هميشه بونا ايليشيرديم. "من اينسانام، آما اوشاق اولدوغوم اوچون اونلار مني گؤرمورلر" دئييرديم. ايندي آما بونون اوچون داريخيرام. يولدا گزرسن، آما هئچ کيم سني گؤرمز. بوش- بوش اطرافا باخارسان، آغزيندا دا ساققيز. بير بيناني سئير ائدرسن، کئچن آداما باخارسان. سن باخديغين حالدا، او سنين اولماديغيني دوشونر و گؤرمز. بئله شئيلر اوچون داريخيرام. هردن اؤلومو خاطيرلاماق ياخشيدير.

س- آتانيزلا بيرليکده بؤيوسه‌ايدينيز، هر شئي داها فرقلي اولارديمي؟

ج- داها فرقلي بيري اولارديم. ان آزيندان آتامين يوخلوغو آغريلي بير مدّت ايدي. او مدّتي ياشاماق ايسته‌مزديم. او مدّتي ياشاماسام پسيخولوژي باخيمدان داها ساغلام بيري اولارديم. آنامين، ننه‌مين ده پسيخولوگيياسي کورلاندي. گؤره‌سن اينديکي آدام اولارديم‌مي، بو ماهنيلاري يازارديم‌مي، هئچ بير معناسي يوخدو. کاش آتام اولاردي دا، آلبوملاريم اولمازدي.

س- اونونلا باغلي نه يادينيزا گلير؟

ج- بير نئچه شکيل کيمي حاديثه‌لر. بيرينده يوخودان دورموشام، آغلاييرام. آتام قاچاراق گلير، مني قوجاغينا گؤتورور. بيرينده ده خسته‌يم، ياتاغيمدا اؤسکورورم. سن دئمه ايکي شئي ياديما گليرميش.

س- مزارينا باش چکيرسينيزمي؟

ج- هردن گئديرم، چوخ پيس اولورام. اصلينده، هميشه ياديمدادير. اونون ويجدان عذابيني حيس ائديرم. گئدنده ايچيمده غريبه بير راحاتليق يارانير. هره دن اؤلومو ده خاطيرلاماق لازيمدير، آما هميشه عيني فورمادا راحاتليق دا تاپميرام. هر شئيي خاطيرلاييرام. ائله جاوان اولوب کي، وفات ائدرکن، 32 ياشي وار ايميش. اوللر آتا دئديگيم، بؤيوک بير آدام اولدوغونو دوشوندويوم آدام ايندي منه گؤره اوشاقدير. ايندي اوندان 10 ياش بؤيويم. اونون اوچون کدرله‌نيرديم. هردن صيرف اؤزومه گؤره کدرله‌نيرديم. اؤزونه دقت ائتمه‌دي. نييه يوخدو دئيه‌رک، عصبيلشيرديم. ايندي باخديغيمدا، اؤزوم ده اونا اوخشاييرام. (گولومسه‌يير) يئمک يئمه‌ين، اؤزونه دقت ائتمه‌ين بيري اولوب. چوخ عينادجيل ايميش. من ساغلامليغيمين قايغيسينا قاليرام. معاینه‌لره گئديرم. اينسانين سئوديکلري اوچونسه ده اؤزونه دقت ائتمه‌ليدير...

تئومانين يئني آلبومونداكي ماهني‌لاري بورادان پولسوز يوكله‌يه بيلرسيز:

http://mix.az/music/26359-teoman-2009-albom.html

[1]- تئومان (teoman) توركييه نين شاركيجي‌لاريندان دير.

[2]- ego = اعتماد به نفس، نفس پرست.