بيري واردي، بيري يوخ...

نصرت کسمنلي

اولان اولوب کئچن کئچيب بلکه ده

ايندي داها کؤورَلمه‌گين يئري يوخ

عؤمروم بويو بئله گليب منيمکي

اوّليندن بيري واردي، بيري يوخ

اوزاقدايدي من ايسته‌ين اوجاق‌لار

اورَگيمدن گليب کئچدي سازاق‌لار

آتالييدي، آنالييدي اوشاق‌لار

بيزيم ائوده بيري واردي، بيري يوخ

گؤزلريمه دولدورموشام ياغيشي

بير کؤينک‌ده چيخارميشام من قيشي

شالوار- پئنجک گئيينيردي تاي- توشوم

من‌ده ايسه بيري واردي بيري يوخ

قلبيم ياندي ايلک سئوگيمدن عشقيمدن

دارا دوشدوم ال اومماديم هئچ کيمدن

مجلس‌لرده جان دئييب جان ائشيدن

دوست‌لاريمين بيري واردي بيري يوخ

اوزوم گولدو طَلبه‌يم دئينده

سيخيليرديم دوست پئنجئيي گئينده

معلم‌له ديل تاپا بيلمه‌يَنده

قيمتيمين بيري واردي، بيري يوخ

من اوردويا نه‌لر گؤروب گئتميشديم

اورک آليب اورک گيريب گئتميشديم

ايکي قيزا کؤنول وئريب گئتميشديم

قاييداندا بيري واردي بيري يوخ

اوزاق گزدي عمي، دايي، بيبي‌لر

سؤز آراسي منه ائولن دئديلر

نيشان اوچون ايکي شئي ايسته‌ديلر

منده ايسه بيري واردي، بيري يوخ

وقت گله‌جک بو گونو گؤره‌جکسن

چوخ سووالا گؤزونو دؤيه‌جکسن

وقت گله‌جک سن اؤزون دئيه‌جکسن

دئيه‌جکسن، بيري واردي، بيري يوخ...